عمشة في بلاد العميان كحلة لنظار

وقيت باش تقيد راهو

2011-07-25T06:41:00.000-04:00

اليومة عيد الجمهورية، صحيح السنا عندو نكهة جديدة، أما أهم حاجة كون عام الجاي إنجمو نحتفلو بيه و يكون أول عيد جمهورية رسخو الشعب التونسي

تعاستنا ما عندهاش حدود

2011-07-22T16:05:00.000-04:00

ستّاش ن عام

مطيْشة في سبيطار بعيييد على دارهم، ما راها حد، ما زارها حد، حتى حد ما يغْزرلها، من مناطق الظّل، ولّا خلّي نقولو لحقيقة، مل هييييه، من هاك البلايص إلي ما نعرفوهمش، ما نمشيولهمش و ما نسمعوش حتى بيهم

حتى حد ماهو باش يزورها و لا باش يطل عليها، حتى حد ما يحب يِمِسْها ولا يطبّس عليها، يِسْهلها شنوّة حوالك ؟ لباس عليك ؟ تاكل

؟ تشرب ؟ حاشتك بحاجة ؟ نعاونك في حاجة ؟

مطيشة في قسم النسا، ما زالت كيف وِلْدت، في الشهر السادس، ثالث مرّة تِحبل، الله أعلم بالصغار لخرين وينهم، حيّين ولّا ماتو ولّا ممكن قَتلوهم، هذا ما حبّش يموت، مكبّش في الدنيا، موش عارف كان باش يعيشِلْها شنوّة باش تعمل فيه،

رضيع هبط في السادس، في العادة يهبط ميت، هذا ما حبش يموت، هبط حي و شادد صحيح، مطيْشِينو في قسم الرضع، حتى حد ما يغزرلو، حتى حد ما يِتْلفّتْلو، حتى طبيب ما يداويه، حتى فِرْمليّة ما تهِزّو، ما حبّش يموت، في السادس راهو مولود، عايش،

ليه 3 يام بلاش دواء، بلاش

couveuse بلاش ،perfusion بلاش

بلاش أكسيجان

يعطيوهم ال غيرو، ولاد الفامليات، ولاد العايلات إلي امّاليهم عرْسو في الصّالات، و عملو الحفلات، و جابو العوّادات، و أمّاتهم غاطسة في الذهُوبات إلّي تِشري النسا و تُضمن السكات

هذا مش ولد حرام، هذا ولد الحرمات الكل، هذا امّو يَتِم اغتصابها من طرف خوها ملّي عمرها 11 ن عام، ثالث صغير، أما هذا حي، حتى حد في السبيطار ما ينجّم يقربلو، ولّا ينجّم يهِزّو، ولّا ينجم يواسيه، هذا موش ذنب أمو ولاّ بوه، هذا ذنب

المجتمع الكل

ذنب الطبيب إلي كيف تجيه مرا تقول عليه يداوي في بقرة، هذا ذنب فرملية تعامل المرضى كيما الحيونات، هذا ذنب القابلة إلي تقول عليها تولّد كل يوم في المعيز، هذا ذنب أم الطفلة إلي تشوف بنتها تُغتصب من طرف وِلدها و تسكّر فُمها

هذا ذنب الجيران إلي يقولو اللطف و احنا شِمْدخّلنا، هذا ذنب الوالي والمعتمد والعمدة

هذا ذنب مجتمع ما يحبّش يغزر ال روحو في المرايا، هذا مجتمع يخبّي العار و ما يداويشي، هذا النفاق والماسك والكذب إلي ما نحبّو نعيشو كان بيه، هذا

ذنبنا الكل، طفلة عمرها 16 ن عام

تولد بيبي في السادس، مطيّش في السبيطار ليه 3 يام ما حبّش يموت

تعاستنا ما عندهاش حدود

وقيت باش تقيد

2011-07-22T03:55:00.000-04:00

Facebook : http://www.facebook.com/event.php?eid=208936499158884&ref=ts

"راهو وقيت باش تقيد"..

2011-07-20T11:11:00.001-04:00

Chères amies blogueuses
Chers amis blogueurs
Nous voudrions faire du 25 et 26 juillet deux journées de bloging sous le thème de l'inscription aux listes électorales, notre slogan est : "راهو وقيت باش تقيد".. Barbech est en train de nous confectionner un logo. Le but étant d'encourager nos compatriotes à se déplacer et s'inscrire aux listes électorales
Nous espérons que vous pourriez vous joindre à nous

Bloguer pour l'inscription sur les listes électorales http://www.facebook.com/event.php?eid=208936499158884

شوفولي راجل أو لا أكون

2011-07-18T08:49:00.002-04:00

قالّك اصدقاؤنا متاع العادة (إلي لازمنا نستانسو بوجودهم ولّي هوما ما عادش صغار جملة، خاطر عمال يستفحلو و يزيدو في الطنبور نغمة)، دارو على مدام بشرى بالحاج حميدة و فضحو ميولاتها الجنسية و عنوستها، هي لا محالة جابتو ال روحها ديما تلعلع و ما حبّتش تسكت، وقت بن علي كانت من جملة إلي واكلة الستاكة، هي و النساء الديمقراطيات (إلي هوما بالطبيعة كلهم عوانس و مثليات و صهيونيات ، مشيش واحد يجي البالو حتى يشك في هذا) تو عاد، من بعد الثورة المباركة إلي هزّتلنا برشة من مستوانا الثقافي والإبداعي قررت الانسة بشرى باش تدخل عالم اللزبيانات من الباب الكبير خاطر اقتنعت إلي الثورة تظمنلها حقها و حق النسا في الاختلاف،

ربي يهدي ما خلق، ما فهْمتش هى إلي النسا إلي ما حبّتش تشد كواجنها مستقبلها عنوسة و لزبيانيزم تحب ولّا تكره، معناها إنت معرسة ولّا لا، لزبيان ولّا لا، حليت فمك ؟ ما تطلع مع

اصدقائنا

كان بايرة و لازبيان، حط تصاور عرسك، تو يطلع فوتوشوب خدام

تو مدام الانسة بشرى استفزت الأصدقاء بالقوي، هي غالطة راهو (شيء طبيعي ديمة النسا غالطين، أمر مفروغ منو)، ما كانش راهو حتى حاد ما جبد عليها بالباهي ولاّ بالخايب، لمرا إلي شادّة دارها، بدنها و لسانها ما يحكي عليها حد : أي تصورو مرا قاعدة في قهوة، ساق على ساق، تعمل في شيشة، تحكي في السياسة، يتعدى واحد تقلو : مآآآالّا زبزوب، إيييييجا منّا ذوق البنة، آش باش تطلع هاذي، ماهي إلّا متشبهة الرجال و لزبيان، حّى حد ما ينجّم يصدّق إلّى هي تبزنس في واحد في الشارع

الراجل منع لمرا انها تتكلم، (كيما منع العبيد والفقراء)، يعتبر صوتها عورة، ولّي نفسها تأمرها بالسوء يحجْروها، و ما دام تو في تونس ما ينجموش يحجرو النسا، يدورو على الجنس، يعتبرو عدم الزواج تقليل من قيمة لمرا والمثلية الجنسية مرض يعايرو بيه لعباد، لمرا إلي تتكلم ما تنجم تكون كان هك، حتى لو كان معرسة هذا الزواج مرفوض، و حتى لو كان هي ما هياش مثالية لازم تطلع لزبيان، باش يقَلْلو من قيمتها في المجتمع ويخلّيو لعباد تنفر منها

النسا منذ قديم الزمان هوما المشكلة، ما فهمتش شبيهم الرجال، لا يعيشو و لا يخلّيو شكون يعيش معاهم، ثمّة عقدة خفيّة تخلّيهم أمّا النسا عندهم منبطحين جملة واحدة (بأتم المعاني متاع الكلمة) ولّا الشك الكل يولّي يدور على ميولاتهم الجنسية، معناها أما مارقين فيك، عافسين عليك، ولّا لازبيان ؟ باهيش تو !!

من عهد السالفين، ولّا حتّى السّلفيين (رغم إلي هوما جدد)، الإغريق مثلاً كانو يعتبرو لمرا صندوق يحتوي بذرتهم إلي لازمها تخطف ما كانش يبدلو مرا جديدة، أما بالنسبة ال جوهم و أمورهم واحتياجاتهم الجنسية هذوكم ليها جواري و غلمان (و يفضلو الغلمان)، النسا المحترمة بنات العايلات يقعدوا في الديار و ماذا بيهم يجيبو الصغار ماكانش وجودهم كيما عَدَمُه،

تو الحملة هاذي الكل، الموجهة ضد النسا و تستهدفش المناضلات و المبدعات، و بصفة عامة لمرا إلي تعبر على موقف مهماً كان كيما صار إل نادية الفاني، و سوسن معالج، و سهام بن سدرين ( في العهد إلي ما بادش، و لاحظو إلي الطرق هي هي) و آخرهم تو بشرى بالحج حميدة هي حملة تشويه سمعة مركزة بدرجة أولى على الجنس : أما قحاب ولّا لزبيانات، و هذا الكل خاطر الأمخاخ لمريضة هاذي تتصور إلي لمرا بمخها و بدنها هي سلعة يكسبها الراجل و بالتالي المجتمع إلي صنعو الراجل، تولي لمرا إلي باش تخرج على السطر و تهرب على القطيع و تناقش في السلطة الأبوية ما تنجّم تكون كان مرفوضة من الرجال : ما عرستش ياخي ولاّت لزبيان،

لمرا في بلادنا ما تنجمّش تكون ختارت باش تكون لازبيان، كيف نقرا النص (ما يتسمّاش نص) إلي تِكْتِب على بشرى نِفْهم إلي فما علاقة بين كلمة آنسة و لزبيان، يعني الراجل رفض لمرا فما كان لها إلاّ باش تتهجّم عليه (بما أنّ الفمنيزم، في قراءة غالطة جداً و متفشية في مجتمعنا و حتى من بين الطبقة المتثقفة، يُعْتبر مهاجمة للرجال) وتولّي لزبيان، يعني ارادتها غير موجودة، منعدمة، الراجل يردها مرا، انسانة محترمة خاطر يحب يعرّس بها ولّا إذا كان هي ثارت عليه ف هذاك زادة يرجع ليه هو على خاطر هو رفضها، ما تنجمّش تكون مناضلة ولّا متثقفة ولّا مبدعة ولّا فنانة

لمرا ما لها إلّا راجل أو لا تكون

على كل لون يا كريمة

2011-07-11T10:33:00.000-04:00

"Mon tour de parole arriva, et voilà ce que j'ai littéralement pensé : « Au diable ! Combien de chances aurai-je de m'adresser à autant de femmes en même temps ? » (...) J'expliquai ce que le féminisme signifiait pour moi : tout ou rien. Je dis que la guerre contre les femmes était une guerre contre nos corps et que c'était avec nos corps qu'il fallait lutter. Je dis que les militantes arabes pour les droits des femmes devraient parler des vagins."

بالطبيعة لكلام هذا ما يجيش منو و موش وقتو، و باش لاهين بربي احنا، الدنيا متّاخذة و نادية الفاني خمْجِتها، مذابينا نشدّو ببّوشتنا و نخبّيو روسنا، وقت حكايات نسا هو تو، نتّاكوْ و نستنّاو العاصفة تتعدّى ولاّ العواصف عاد خاطر احنا كل نهار غاطسين في عجاجات من أنواع خاصة، كل نهار و قسمو، و كل مرة يطلعولنا بطلعة جديدة،

أي نزيدكم زيادة، قبل ما تكملو تقراو المقال و تفهموا علاش لمرا هاذي قالت كلام كيما هكّ في مؤتمر كيما هذا، شوفو فين لقيتو المقال : موقع اسمو الجمعية الدولية للساحقات والشواذ جنسياً والمتخنثين (متأكدة إلي غالطة هاذي، أما هذا شنو حط المعجم، يمكن كلمة أصح تكون المزدوجين جنسياً) والمتغيرين جنسياً (موش موجودة هاذي جملة، قال المعجم : نأسف لعدم وجود نتائج بحث) والمختلطين جنسياً (نفس الشي ما ثمّاش بالعربي، ممكن خاطر لعرب ما عندهمش ال "مشاكل" الجنسية هاذي، موش كيما الكفار الماصونيين والعياذ بالله)،

طحت بالموقع هذا بالصدفة و انا نعمل في بعض الأبحاث على الحركة النسوية في البلدان العربية، واكتشفت إلي من كل شي موجود شوية، ملي يسب في الغرب و يعتبرو من أشنع ما ثمة،كيما هذا قالك يهيْجو علينا في النسا و يحرضو ل "ملكية المرأة لجسدها" (تو معقول ؟ تملك هي لمرا ؟ عيب عليهم) و يزيد مالفوق يحرضو على "الحب الحر" و يدافعو على "الحق المطلق في الإجهاض"، معناها كل ما يحل في النسا و يخليهم يركبوا على الرجال (اللهم عفينا، الستار حي).

والله بالنسبة ليا شي يفرح إلي موجود التيار هذا زادة على خاطر كل إنسان أو كل مرا عندو ولا عندها الحق في الإختلاف، كيما ما نادية الفاني عندها الحق بش اتقرع راسها و تقول ربي موش موجود من غير ما تقوم الدنيا و تقعد وحنا كينّا في العصور الوسطى، باش نتشبهو بالغرب و نولّيو نحرقو في النسا، ولّا موش لازم التشبّه بالكفّار عنّا طرق أصيلة متاعنا كيما الرجم مثلا (يواتي النسا)

حكاية جسد المرأة وحق الاختلاف في الجنس ((إلي يلزم يكون من البديهيات) ذكرني في حكاية سمعتها الجمعة إلي فاتت و ما نجمّتش ننساها خاطر استغربتها برشة، قالولي إلي في السبيطرات في تونس، الاطباء والفرمليات ينصحوا لعروسة العذراء بكريمة مبنجة :

استنى إنفسركم مليح تو خاطر ما اتجي على بال حد لحكاية،

ثمة كريمة يستعملوها الطبة متاع المعدة في الفبرسكوبي، الآلة هاذي تتعدّى من الحلق باش يشوف الطبيب شنوّة فمّ في المعدة، العملية معروفة توجع برشة، ثمة كريمة يستعملوها تتدْهن على القراجم و الصدر الكل، تبنّج المناطق هاذي و المريض ما يحسّش برشة لوجيعة،

فهِمتو تو ؟

معناها لعروسة ينصحوها باش تدْهن بيها، باش وقت العلاقة الجنسية ما تحس ب شي !!!!

يقول القايل هو باهي، معناها ما تحسّش بالوجيعة، أيه صحيح، أما يظهرلي كان فم شوية مشاركة من المرا في العلاقة الجنسية راهي بطبيعتها ما تحسش بالوجيعة، إذا كان العملية هذي يقومو بيها لثنين موش واحد بركة (الراجل وحدو) و تاخو الوقت الكافي راهو ه الكريمة موش لازم منها،

تصورت كيفاش لعروسة أول علاقة ليها مع راجلها باش تكون علاقة إغتصاب مقنّنة، معناها هي موافقة باش راجلها يعتدي علاها، و باش تستحمل لوجيعة تستعمل كريمة مبنجة !!!

كيفاش يواصلو هاذم حياتهم الزوجية وقتلي هي من النهار لول لمرا استسلمت للراجل وتصورت إلي هي علاقتها بيه علاقة الأقوى بالأضعف، واللي حمدلله يا ربي إلي الطب تقدم و عاونها عليه !!

كيفاش فم طبيب يسمح ال نفسو باش يحطم من النهار لول علاقة مرا ب راجلها و يخلّيها عمرها الكل تنظر ال نفسها الى هي حاجة يستعملها الراجل و هي ما ليها إلا أن تتقي شرّو بالكرايم المبنجة !

شفتو قدّاش بعدنا اشواط و اشواط من الموضوع الاول، وكيفاش عباد تطالب بالحق في الإختلاف الجذري وأحنا نبنجو في أجسادنا و مخاخنا...

صوابع يدينا موش قد قد

2011-06-05T00:50:00.000-04:00

ه الأيامات انا في تونس و نعيش في أجواء ثورية بحتة ، ثورة من هنا ثورة من غادي، ثورة في كل زنقة و كل نهج، برشة ثوريين و ثوريات و الدنيا هانية بوجودهم، هو قبل كان فم برشة قفافة و صفاقة و قوادة، أما هذا عهدٌ بائد، تو ولاو برشة ثوريين و ثوريات في إطار المساواة الكاملة بين الجنسين إلي لعباد الكل تنادي بها و موافقة عليها موافقة تامة و النهضة قالت إلي بش تحافض عليها و تنميها (مساكن نسا النهضة قريب بش إقوللهم الحجاب حرام قبل الانتخابات، و نسا البوكت هوما إلي لابسين : وحدة متحجبة تنادي يا رفيق يا رفيق و هي في مسيرة لتطبيق الماركسية ل سترجاع حق العمال )، ثورة ثورة حتى النصر، كلو حسب إحتياجات المرحلة، كل وقت و وقتو و احنا شعب حليم و متسامح و يتاقلم مع

جميع الظروف، ما علينا، هذا مش الموضوع

الموضوع خاطي جملة، موش الثورة،بالاحرى هو إنعدام الثورة ، الموضوع هو بلاصة مشيتلها موش ثورية جملة و ما سمعتش أصلاً بالثورة كانت هك، مازالت هك و الأغلب باش تكمل هك، أولت البارح، هزوني جماعة صحابي لبلاصة صعيب شوية بش تكونو تعرفوها، خاطر لازم الواحد تبدى عندو برشة شجاعة ثورية باش يدخللها (انا جاتني لحكاية على غرادة ما كانش والله لا نعفسها)، شفت فيها بصراحة إلي عمري ما شفتو، إن ديركت، لايف، مباشر،

قبل ما نكتب البوست هذا خممت برشة إذا كان عندي الحق نكتبو والا ل، نحس في روحي كيني ننظر للعباد مل فوق أو نسمح لنفسي باش نحكم عليهم، ك ينو البوست هذا باش يعبر على نظرة انتروبولوجية، ك لغورا إلي تجي تقرا علينا و تكتب لكتب و تكون الأخصائين و تصرف في الفلوس و جد بوهم منحي و ديمة يطلعو أوت في لخر،و هاذي حاجة لا نحب نطيح فيها و لا نحب نقصدها، أما إلي ريتو لازم نحكي علىه خاطر فات لعقل، ننجمو نقولو صدمني و لي مدة ملي الاوضاع الانسانية ما عادش تصدمني

المكان هذا في قلب تونس، شارع مرسيليا يظهرلي ولا شارع موازي ليه، هو cabaret ولا كفيشنتا ولا حاجة من النوع هذا، دخلنا، الدنيا مليانة، فما يجي 2n عساس في الباب، يتفاوتو شوية و برة في الطول والعرض، أما ضاهر خلطتلهم الروح الثورية، خاطر يخدمو مساكن طالعين هابطين في الدروج يعسو على السكرجاية و السوكرجيات (خاطر في هذا و في ه المكان، كيما عند النهضة و البوكت يتساوو النسا و الرجال)، كيما ما تنجمو تفهمو لبلاصة كلها ما يسمى بالفصايل والخلايق (بالرسمي موش تنقنيق مني راهو)، إلي جلب انتباهي في المكان هذا موش الرجال وانما النسا، لأني بالطبيعة ديمة نرا النسا ك ضحايا للرجال هاذم و ممكن زادة لأني ايست م الرجال و وليت نعتقد إلي هوما ما ينجمو يكونو كان هكاك وإلي هذا شي فطري عندهم، نقصد هوني الإنحلال الأخلاقي و العربدة، ما ريت حتى مرا في المكان هذا ما تخدمش ب الفلوس، ديمة لبلايص الكل فيها و فيها، مخلطة، هاذي ما فيها حتى نوع من الإختلاط، الغاية هي نفسها،

واضح بالضبط المكان شنوة فيه هو عبارة عن مكان للدعارة فقط، النسا إ<تجي تعرض خدماتها على رجال عندها فلوس بش ا<تخلص والحق لا ريت عركة لا تجاوزات لا شي، الكل يصير بطريقة عادية، المرشي مفتوح هات فلوسك برك، إلي لاحظتو و تعبني إلي النسا هاذم فيهم برشة بنات صغار بالكل وجوهم تعطي العشرينات، بدنهم يعطي الخمسينات، ما نعرفش علاش أغلبيتهم سمان برشة و بطريقة غريبة، كروشهم قدامهم، مفروتة، و كيف يشطحو ما ا<ترى كان الشحومات تتهزهز، معناها موش كيما الأفلام المصرية جملة وين وحدة تبدا تشطح و تتزعبن، ما ثمة حتى نوع من الخفة أو الجمل أو الرشاقة أو أي حاجة ملي نرملمون مرا تخدم في الخدمة هذي يبداو عندها باش تجيب كليونات باهين، هاذم يكسبو نوع من الخيوبية عمري ما ريتها، نلقى في صعوبة تو بش نفسر النقطة هاذي إلي هي أهم حاجة جلبت انتباهي : حسيت إلي لخيوبية هاذي مكتسبة مش نتورال، موش من عند ربي معناها، في الأصل كانو نسا عاديات، أما عيشتهم و حياتهم خلاتهم يتبدلو physiquement، بدنهم يتبدل، يتعوج، يتحل، يتفرت، والأهم إلي هوما يظهرو نورمال ما ثم حتى مشكل، عادي جداً، ما فم حتى نوع من العذاب ولا التعب،هذا الضاهر بالطبيعة، الدخلاني ما نتصوروش ساهل باش يتعرف، إلي قريتو و سمعتو أ<و ريتو قبل على خدمة االجنس حاجة ولي ريتو المرة هاذي حاجة أخرى، ريت نسا مدمرين جسدياً، ريت قدامي أبدان مهدمين محطمين، بالفعل التدهور الجسدي والإنساني بأتم معانيه ريتو في إلمكان هذا

ما نجمش نواصل خاطر نحس في روحي بعيدة برشة ما إنجمش نفهم و زايد أصلاً باش نحاول نفهم أي حاجة لانو النظرة الخاريجية متاعي ما تنجم تكون كان غالطة و ما تنجم تكون كان في ديناميكية إستيائية عمودية موش أفقية، نقول لكلام هذا بكل أسف خاطر حتى لو كان نحاول ما نقرب للحقيقة بالكل

في الأجواء هاذي و انا 'نتفرج' (هذاك إلي صار) في إلي عملتو الدنيا في لعباد تسئالت ويني الثورة زعمة باش تخلط نهار ل النسا هاذم ولا صوابع يدينا موش قد قد؟

تبزنيسة فاشلة وأسبابها

2011-04-19T16:28:00.000-04:00

اليوم باش نرجع إل مواضيع العادة، خاطر في المواضيع الجديدة الحق طلعت كعبة لا، خاصةً مثلاً كان باش انعلّق على الأخت المنقبة إلي تقبحت في استاذتها أو جبتلها خوها باش يضربها إلى ما غير ذلك من حاجات تخلي الواحد يقطع شعرو و ينزل على دويات لعصاب وتكمّل تربح النهضة في الإنتخابات يولّيو يهدرو دمي و برّى، امّالا آش لز حمّ يغنّي خلّى نكتب كليمتين ينفعو المؤمنين و المؤمنات بوجه

الخصوص خير

الحاصل إتّصل بيا صديق يحكيلي في مشكلتو العاطفية، هو الحق موش يحكيلي يفرّغ في قلبو، هو يحكيلي باش يفهم علاش، يحب يفهم نفسيّة المرأة، خاطر ظهرلو إلي الوضعية إتفوت قدراتو الرّجولية على الفهم (هو في حد ذاتو و بمنعزل عن الموضوع، حاجة باهية إنو الرجال يستعرفو أخيرا و يفهموا إلي هوما ما يفهموش والّي حتى بعد قرون طويلة من محاولة السيطرة باقى ما فهموش، ولّى عملوه الكل تقلب ضدهم و بره عاد كيفاش باش يسلكو تو)

أنا فهّمتوموش نفسيّة المرأة، لأنّو نفسيّة المرأة كيما نفسية الرّاجل تتبدّل حسب الإنسان، و إنّما شنوة عمل المجتمع في المرأة و كيفاش خلّاها تغزر لروحها

نرجع للموضوع : لوليّد هذا، شاب في مقتبل العمر :) يخدم في البانكة مدير، معناها موش شوية، من عائلة عريقة و معروفة في بلادو، اشبيّب، قاري، ما يعيبو شي حتّى من جيبو يتسمّى مليان (أمّا موش برشة)، جات تخدم معاه بنيّة يا حليلتها، شبيْبة، عاقلة، بوها يهز و يجيب (مهم جدّا) راسها مل قاعة ما تهزّوش، إلى آخره من صفات حميدة مفقودة في ه الأيّمات الصعيبة، عجبتو الطفلة،تصوّر إلّى هو زادة عجبها ولا هكّة ظهرلو إلّى هى فهمِتّو، حاصل بزنسها بكل أخلاق حميدة، ظهرتلو متجاوبة عال لخّر، بعد النظرات والإبتسمات والضحكات قال، موش في قرارة نفسو، قاللها، نتعدّاو تو للموعد، وما راعه إلاّ : الإستياء العميق أو بالتونسي الأصيل الحشية الكبرى، intéresséeقالت لا، ما نيش

، مسكين ما فهمش، دوّرها في مخّو مرة، ثنين، ثلاثة ما نجّمش يفهم علاش إذا كان ضهْرت إلي هي متجاوبة

هذاي كان تفسيري للوضعية :

الطفلة ملّول هو موش عاجبها، ما حلالهاش في عينها، كيف بزنس علاها ما كانتش مل عاكسين على خاطر هي في داخلها إمرأة لعوب:) allumeuseمعناها

، هذاك دور المرأة : تتقبّل تبزنيس الرجال الكل و تختار منهم واحد برك، الأحسن، الأجمل، الأقوى، هاذم الكل يتلخصو في وقتنا هاذ بالأغنى ولّى عندو أكثرنفوذ، كونهاتخلّيه يتغرم بها ويحاول يتقربلها باش هي مبعّد تقلّولا بالنسبة ليها إنتصار في حد ذاتو، نوع من الإنتقام من الرجال الكل إلي هوما كلهم يحبّو على حاجة بركة، هي تعرف إلي في لخّر الهدف متاعهم واحد، أما بش يتمتعو بيها ويطيشوها والاّ باش ياخذها واحد، يعرّس بيها، يتمتع بيها و يلوّحها فى الدّار، نفس الشي، نفس النتيجة، في جميع الحالات الراجل إلى يتقربلها ماهو إلاّ طامع في حاجة، أو مدام هي حاجة، هي إلي تلعب به، اطمعو و تجبد بيه و تخلّي روحها للّي باش يدفع أكثر مدام هي

مرغوب فيها

كيف فسرت ال صديقي، ما فهمش، قالى لا هي بنيّة عاقلة، بوها حزّار وما تابع ذلك، جاوبت إلي يدفع أكثر موش معناها هي تخدم بالفلوس ولّا حاجة كيما هكّة لا سمح الله، معناها هو مدير في البانكة، هي تحب على رمع، هو أستاذ، هي تحب على المدير، هو طبيب هي تحب شاف د سرفيس، بما إنها مزيانة و صغيرة وعاقلة وبنت فاميليا و قارية، هو ما يقدرش علاها،

لبنات هاذم يتربو بلاش حب، يتربّاو في محقرنيّة أنفسهم كنساء، وبحسبان قيمتهم بالفلوس : مثلا الصالة متاع العرس،الصاغة، الديامونت،إلخ

بوها يهز و يجيب باش يظمن قيمتها و ما يطيحش سوقها

كان جات عندها نظرة لرّاجل ولنفسها خير من هكّة راهى ملّول فهمتّو إلّى ما عينهاش فيه، التلوعيب هذا بالنسبة ليّ يعنى إحتقار كبير للعلاقة بين النساء والرجال

هذاي رأيي في موضوع بسيط كيما هذا والله أعلم

رفلاكس قديم لثورة جديدة

2011-03-17T10:00:00.001-04:00

بما أنّى حاولت نكتب في السياسة و شي، طلعت ظلمة ما نفهم شي، قلت عاش من عرف قدره، الواحد يكتب في حاجة يفهمها خيرلّو من وجيعة الرّاس والإسترجال القبيح إلّى نشوفو فيه كل يوم، و هي هات شاشيتك هات صباطك، وهو ما يثبت إن الشعب التونسي متمدن ليه مدة، بعدلي يحكي ب الصبابط من قديم الزمان موش ك تو، هاي ولّات قبائل و عشائر و ما نعرفش شنّو، غريبة والله، تو ثورات العالم الكل تطمح للتقدّم و ل ما أفضل، ما فهمتش شبينا نحنا عندنا الحنين للماضي البعييييد

الحاصل أنا قلت ما نحبّش السياسة و ما دخّلنيش فيها جملة، هاني نتفرج و كاهاو

ما دام عاد الموضوع الحالي في المجتمع التونسي (يا ربي وقتاش ترجع الكورة خلي نتفرهدو) هو السّياسة عاد انسحبت و شدّيت ببّوشتي، ياخي اللطف يا ربي، يجيك لقضا يا غافل، قد ما نتفادها قد ما تجري في جرتي، حتّى كيف ما نشلقش، يجيني ميساج بريفي باش نشلقك و ما اننجمش انتلّف

تو الفيديو هاذي مصرية موش تونسية، كان جات تونسية راني أعملت أتاك (سقطة قلبيّة معناها يا غسّان:))، أما الصدمة كانت أهون، صحيح هوما أشقاء، و إخوان(وخيّان نقصد، خاطر حتّى ماللّغة إستحوذو عليها) و زملاء في الثورة، أما وقت الرسمي روحي روحي لا ترحم من مات، أو هاذاي طلع تخلّف مصري موش تونسي، خاطر احنا حفظنا الله ما ناش بش نوصلو لشّي هذا، أنا باقى إنسانة متفائلة، مكبشة في التفاؤل

الفيديو، اتفرجو عليه ميسالش، 23 ثانية فقط، أما تَبارك الله قدّاش معبرة، معناها أغزرو تنفيذ الفكرة قداش مودرن والله حتى بوستمدرن (إنت والسكولة إلي تنتمي ليها)، فلاش: زوز تصاور، أربعة جملات، فيها همّ العالم العربي والإسلامي الكل.

قامت ثورة في تونس،مبعّد في مصر، تو فالبحرين، اليمن، القذافي يذبح في اللّيبيّة كما لعْلالش، باش نقعدو في نفس المعبوكة متاع 20 قرن ال تالي ؟

شمعناها ثورة ؟

الثورة كان موش الاطاحة بكل ما هو ظلم وإستبداد وإسترجاع كرامة وحقوق، ما تتسمّاش ثورة،

معناها مرة أخرى تقوم ثورة متاع رجال لمكاسبهم الخاصة، لكرامتهم هوما وحقوقهم هوما ؟

ما عنديش أصلاً تعليق على الفيديو لأنّو الميساج واضح، والفكرة معبّرة جداً و ما لازمهاش برشة تعليق، لازمها منوحة ونقيمو جنازة على روح الثورة المباركة أشرف لينا، خاطر الثورة قبل ما بش يقتلوها سياسيّن البارح، و أتباع النّظام البائد والمندسّين والعملاء إلى آخره من نعوت جديدة لرفلاكس قديم، احنا، الشعب العربي المجيد، باش نقتلوها بالعرق بالعرق، شويّة شويّة، مرا مرا، طفلة طفلة، بنَيّة بنيَّة

قلك قوي سعدك قلك تو تو

2011-01-30T05:08:00.001-05:00

لي برشة ما كتبتش و ما عادش نكتب، عندي إحساس بالعقم ليه مدة ملي بدا يستقر، كل مرة اندزو شوية، نحاول باش ما نستسلملوش، نحاول نجيب أفكار جديدة أما ما نجحتش، عام 2010 كان بالنسبة لل بلوغ شايح لايح ما جاب شي جديد ولا ينفع، ملي صارت الثورة قلت انشالله باش يمشي علينا الكساد بجميع أنواعو، قلت باش نرجع للبلوغ وقتلّي تتفرهد لومور، تولي عنا حكومة و نبداو نبنيو في المستقبل، كل واحد بتصوّراتو، كل واحد ب أفكارو ولّي يقدر عليه،

قرّرت باش نفتّح في الأكحل نفتّح شويّة في الألوان و نحاول باش نحكي على مكان المرأة في المجتمع الجديد إلي باش نبنيوه مع بعضنا،

كل يوم يصير تنقيح وزاري نفرح شويّة، مبعّد أقل من ساعة تهبط الفرحة و ترجع الفجعة، آخرتها نهار لخميس، تكلم الغنوشي، جاب جماعة جدد، حتى حد ما قال هاذم دوسياتهم إمسخة، قلت سلكنها س ي، تو الواحد يزيه من غصرة إل غصرة، وقيّت أوّل حاجة باش نفرحو، خاطر أنا وحدة من الناس، و موش وحدي، ما زلت ما نجّمتش نفرح على قاعدة صحيحة :) و بالطبيعة نبداو نخممو في المستقبل، أمّا ممكن ساعة مبعّد من الإعلان على الحكومة الجديدة، كلات بعضها في القصبة، و رجعت لعباد في تويتر و فايسبوك غنوشي digage، حكومة digage، قلت كان إنكملو هك، كل نهارين وزراء جدد، تو في6 شهور في عوض ما نعملو ديمقراطية و إنتخابات و مصروف زايد باش يكلفنا ملايين الدينارات، إلي أحنا ما عناش، بعدلي الجماعة عرّتلنا روسنا، نبداو نتداولو الكل على السلطة بطريقة سلمية على خاطر شوية شوية باش نولّيو الكل وزراء و شوف نرضاو شوف لا، قالت ألفة يوسف لازمنا برلمان فيه 10 ملاين ن كرسي، و هذا بالطبيعة ما يسمى بدكتاتورية الشارع، وقتلي كل شي يوقف و ما عادش إنجمو نقدمو خطوة

نهارت الثورة، معناها نهارت 14 جانفي قدمنا بارشة، عملنا خطوة عملاقة، تعدينا من الذل و الخوف و الميزيريا، إلي ما ثمة حتى تونسي ما حسش بيهم، فقير ولّا غني، قاري ولّا جاهل، مناضل ولّا عياش، تعدينا من أكثر النظم بشاعة و قبح للحرية جملة وحدة، تعدينا من الضد للضد، ملّى كانو عافسين فينا بكبيرنا بصغيرنا، أحنا التوانسة عفسنا فيهم أو فرّجنا عليهم العالم، التوانسة ألي هبطت للشارع، التوانسة إلي وقفت قدام البوب ول بولسية، التوانسة إلي الكرامة عندهم ساوات الحياة حرّرو لبلاد و لعباد، ثورة تونس من أهم الثورات تو، لكتب إلي باش تخرج تو، النظريات إلي باش تتعمل في المستقبل الكل في ما يخص تطور الشعوب، الكلها باش تحكي على الثورة هاذي

في يدينا أحنا التوانسة إلي ما متناش بالكرتوش في الشارع إنا الكتب هذي باش تحكي علينا إيجابيياً أو سلبياً، من واجبنا إنو ثورتنا تهزنا للحرية و الديموقراطية، من واجبنا إنو دم ولادنا ما يمشيش حرام، من واجبنا اننا نقراو، نتثقفو سياسياً، من واجبنا نحلو مخاخنا، نتقصّاو المعلومات قبل ما ننشروها، ت هاو ما عادش تفدليك، هاو بالحق فايسبوك طلع عندو دور كبير في إنو النظام طاح و الثورة نجحت، ت إلي اقلك الجزيرة بكلها تاخذ في الأخبار من فايسبوك، معناها إليوم إلي عندو فايسبوك ولي عندو تويتر ولي عندو انترنت بصفة عامة مسؤول على نجاح الثورة، نجاح الثورة معناها حرية و ديمقراطية، هذية الغاية، كيفاش نحققوها الكل مع بعضنا، إذا كان كل واحد فينا إخمم دقيقة وحدة قبل ما احط رابط ولا اقول كلمة برشة إشاعات ما تتعداش و برشة أفكار تهديمية ما تتعداش

نرى في حاجات على فايسبوك و تويتر ما نفهمش كيفاش لعباد إتنجم اتحطها، انا مع الاختلاف في الرأي أما موش مع الفوضى، شنوة مصلحتنا اليوم ؟ شنوة هدفنا ؟ من مصلحتنا توقف بلادنا ؟ تنهار جملة وحدة ؟

من مصلحتنا أحنا كتوانسة كوننا ما نخليو حتى وزير، حتى مسؤول يرتاح على كرسي ولا يتمتع بيه، من مصلحتنا إنو تكون فم حكومة انتقالية في البلاد، من مصلحتنا كونا نضغطو عليها و نفهمو غنوشي ولا غيرو خاطرهم الكل كيف كيف إلي وفى العهد القديم، إلي مصلحة اlشعب فوق أي حاكم، أما الفوضى موش من مصلحتنا، خاطر عنا جيران تستنى فينا في الدورة، خاطر تونس موش وحدها في العالم، خاطر فرنسا و أمريكيا في حرب باش إسيطرو على الوضع (فرنسا خسرت لا محالة)، أما ما ننساوش إلي الثورة هذي عمرها جمعتين، أحنا مطالبين باش نحافضو عليها، حاجة مستحيلة باش القناة التونسية تنسى أكثر من 50 سنا قمع في جمعتين، حاجة مستحيلة باش سياسي البارح يصبح ديمقراطي اليوم، حاجة مستحيلة باش تونسي البارح يصبح ملاك اليوم،

بورقيبة قال للفلسطينين خوذو تو و زيدو اطلبوا مبعد، قالولو لا و ضربوه بالطماطم...

par Line Hachem

2010-12-16T10:05:00.000-05:00

كتاب مفتوح إلى السيدة الأولى وفاء سليمان

http://shabab.assafir.com/Article.aspx?ArticleID=1734

أنا امرأة لبنانية أبلغ من العمر 22 عاماً، من أسرة متواضعة جدا، ولدت وكبرت في الضاحية الجنوبية لبيروت، درست في المدرسة الرسمية ونلت شهادتي الجامعية من الجامعة اللبنانية. حالياً، أعمل في وظيفة متواضعة تكاد لا تكفي لتغطية نفقات تنقلاتي، وأطمح إلى نيل منحة ما تتيح لي تحصيل شهادتي في الدراسات العليا في مكان ما خارج لبنان، لأن "الماستر" في الجامعة اللبنانية غالبا ما يورث الطلاب "أمراضاً" عصبية وذهنية، وليس باستطاعتي ماديا التسجيل في أي من الجامعات الخاصة.
ما حضني على التوجه إلى حضرتك، دعوة وصلتني قبل أيام لحضور "منتدى المرأة العربية والمستقبل"، بعنوان "منتدى عن القيادة والمسؤولية الاجتماعية" الذي عقد برعايتك يومي الخميس والجمعة (2 و3 كانون الأول الجاري) في بيروت، وتحديدا في فندق "فينيسيا انتركونتيننتال" للعام الرابع على التوالي. توجست خيفة لأن خبرتي القصيرة في مجال قضايا الإنسان والمرأة تحديدا، أكسبتني نفورا من العناوين الكبرى والمؤتمرات البراقة والثمينة، التي عادة ما تجمع النجوم والنجمات على أطباق شهية وأحاديث لذيذة وتغطية إعلامية عابرة للمحيطات، لا يكسب منها شيئا من هم "دون النجوم".
قرأت برنامج المنتدى، ووجدت أن بين العناوين المقرر مناقشتها، ما هو هام وضروري مثل "السياسة، الأعمال والمسؤولية الاجتماعية" و"المرأة والسياسة"، إلا أن الفترة المخصصة لتناول الغداء (ساعة ونصف) كانت أطول من الفترة المخصصة لتناول هاذين الموضوعين (ساعة وربع). قرأت لائحة أسماء الضيفات والضيوف المدعوين لإلقاء الكلمات وإدارة جلسات المنتدى، وللأسف لم يخب ظني: نواب ووزراء ونائبات ومسؤولين ومديرات ومشاهير ونجوم ونجمات، من لبنان والدول العربية. لا أحد بينهم وبينهن يشبهني في المضمون، وعلى الأرجح في الشكل أيضاً.
حضرة السيدة سليمان، إن أزمة هذا المنتدى برأيي ليس فقط أنه يكلّف أكثر بأشواط مما يثمر، ويركز على كرم الضيافة والمظاهر المرتبة والكلمات المنمقة، بل أنه أبعد ما يكون عمن يدّعي تمثيلهن والتحدث باسمهن وعنهن ومن أجلهن. هذا المنتدى لا يمثلني، ولا يمثل أمي التي لم تجر يوماً عملية تجميل، ولا يعبر عن عمتي المطلقة، وخالتي الأرملة، وابنة عمي التي تحمل شهادتين جامعيتين ولا تجد عملا، وجارتنا التي أسمع كل ليلة أنينها تحت قبضة زوجها، وصديقتي الأخرى التي تعجز عن تمرير جنسيتها لزوجها الفلسطيني وأولادها، و"نيليا" العاملة المنزلية الفلبينية التي تحتجز "مدامتها" أوراقها وتمنعها من العودة إلى ديارها.
أيتها السيدة سليمان، إن أردت رعاية منتدى حقيقي، اسألينا نحن النساء الحقيقيات، اسألينا عن تعرضنا للتحرش كل يوم في الشارع وفي الباص رقم "4". اسألي "ماريا" صديقتي، عاملة الجنس، عن ظروف عملها. اسألي "فاديا" في مخيم "صبرا" عن أمها التي توفيت نتيجة إصابتها بفيروس قاتل في الكبد ناجم عن التلوث البيئي، بما أن إحدى الجلسات تناولت موضوع البيئة. اسألي "لما"، صديقتي المثلية عن معاناتها كل يوم في العمل والشارع والمنزل لمجرد أنها لا تريد الزواج. واسألي "رنا" التي تعمل 12 ساعة في اليوم لتدفع نفقات دراستها الجامعية. كذلك بإمكان حضرتك زيارة "خالدة"، الصبية ذات الاحتياجات الخاصة في منزلها، لأنها لا تخرج أبدا من المنزل.
حضرة السيدة سليمان، أنا وصديقاتي "نادين" و"سارة" و"فرح" و"مايا" وكثيرات غيرهن، لم نعرف شيئا عن المنتدى إلا حين تلقينا دعوة لحضوره، وليس للمشاركة فيه كمتحدثات عن تجاربنا الشخصية كنساء وكناشطات في مجال تحقيق العدالة الجندرية. وعلى الرغم من ذلك، كنا لنحضره كي نعبّر وجهاً لوجه عن الأفكار التي سقتها في هذه الرسالة، لولا أن بطاقة الحضور تكلّف 300 دولار، وهو مبلغ يوازي ما أدفعه من إيجار شهري، وضعفي ما تتقاضاه "نيليا". هل يجوز أن يمنعني وضعي المادي من التعبير عن معاناتي وآرائي وتجاربي، في منتدى يدّعي التحدث باسمي وعني؟
حضرة السيدة سليمان، لماذا الإصرار على عقد هذا المنتدى في بيروت وفي فندق "فينيسيا" تحديدا للعام الرابع على التوالي، على الرغم من أنه يدور حول أوضاع "المرأة العربية"؟ هل لأنه "وطن تحرر المرأة والانفتاح والتقدم"؟ عذرا من حضرتك، لكن لو خيّرت بين الرقص كل ليلة في ملاهي "الوطن المتحرر"، أو الحصول على قانون يحميني من العنف الأسري ويتيح لي منح جنسيتي لأولادي في "وطن متخلف"، لاخترت الثاني من دون تفكير. لماذا لا يعقد المنتدى العام المقبل إذا "وقع الخيار" للمرة الخامسة على عقده في لبنان، في مخيم "شاتيلا"، بما أن الفلسطينيات نساء عربيات ومن المستحيل حاليا زيارة فلسطين، كما تدرك جامعة الدول العربية الراعية للمنتدى كذلك؟ من الممكن أيضا عقده في إحدى قرى عكار، أو في سهل البقاع مع المزارعات البقاعيات، أو في قريتي الجنوبية "رب الثلاثين" التي ليس فيها مستوصف طبي تلتجئ إليه النساء المسنات، أو صف واحد يعمل على محو الأمية المستشرية؟ ومن الممكن الاستعانة بطالبات كلية الإعلام العاطلات عن العمل لإدارة جلسات الحوار، ودعوة الناشطات اليافعات للحديث عن تجاربهن، أولئك اللواتي يقضين أيامهن في الشوارع والأماكن الشعبية والتجمعات النسائية العفوية، وبذلك يستثمر المبلغ المخصص لتنظيم المنتدى، في دعم النساء للبدء بمشاريع عمل صغيرة يعتشن منها.
حضرة السيدة سليمان، في اليوم الأول للمؤتمر، وزعت الجوائز التقديرية بين الساعة العاشرة والعاشرة والربع صباحا، على ثلاث نساء شهيرات صاحبات انجازات تستحق التقدير، لكن هناك فكرة تنتابني بقسوة ولا يسعني إلا التعبير عنها: ألا تستحق جارتنا "أم حسين" جائزة تقديرية، تلك التي تخبز الصاج يومياً لتطعم أربعة أولاد تركهم لها زوجها الذي استشهد في حرب تموز في الجنوب؟ فكرة أخرى تنتابني أيضا فيما أقرأ عن الفترة التي خصصت في اليوم الثاني لثماني نساء شهيرات أيضا لتوقيع كتبهن الصادرة حديثا: ألا تستحق "سناء"، الكاتبة العشرينية الموهوبة، دعما ولو صغيرا لتحقق حلمها بإصدار أول ديوان لها، هي التي تحاول منذ سنتين تجميع مبلغ ألف دولار لهذا الغرض؟
حضرة السيدة الأولى، كان لدي الكثير لأقول في فترة "الحوار المفتوح" الذي اختتم به المؤتمر، لكني للأسف لم أحضر لأني لم أتمكن من تدبر مبلغ 300 دولار أميركي، فاضطررت إلى التوجه إلى حضرتك عبر الصحافة. لا أعرف ما طبيعة الحوارات التي جرت في المنتدى والأفكار التي طرحت، وقد لا يقدّر لي أن أعرف العام المقبل أيضا، لكن ما أنا على يقين منه بالرغم من صغر سني وقلة حيلتي وخبرتي، أنه لو أريد لهذا المنتدى أن يكون حقيقيا وفاعلا وناجحا، عليه أن يكون أقرب إلى التراب منه إلى النجوم، فالقائدة التي لا تمسك الوحل بكفيها وتنظر وجها لوجه في عيني القذارة والفقر والبشاعة، لا تستحق أن نؤمن بها.

يا مزيّن من برّة، تره نطل حتّى شويّة

2010-11-09T03:35:00.001-05:00

ملّى المخرج السابق النوري بوزيد (نعرف إلي ما حقنيش أما يظهرلي س يا ، مسكين، الكريار متاعو تحطمت كان نشوفو عدد لعباد إلي تسب فيه تو) جبد على العذرية في تونس، و الترقيع و ما إلى ذلك من مواضيع تحشم وما تخرجش علينا، و يزيد قالو يسب في نسانا و يشوه في سمعة لبلاد (بالطبيعة مادام سمعة لبلاد بين فخاذ نساها)، و يضهرلي الدنيا قامت و ما قعدتش في فايسبوك، بما إنو لبلاصة الوحيدة إلي التوانسة تنجم تقول فيها حاجة تشبه للرأي، أما هذا موضوع أ خر تو نرجعولو ك تواتي الفرصة،،

أغلبية التعاليق إلي تحك في الموضوع تقول، جروسو مودو، أشدخلو هو، منين يعرف، ما عندو حتى أرقام، كيفاش يسمح ال نفسو، مادام قال ثلاثة أرباع، لازم يحكي على مرتو و بناتو وهو

ما نسميه أنا بذاءة و قلة حيا،

إلى أقصى درجة، و بعد ما يقولو كلام هكّة يحسّو رواحهم متربّين خير منّو، والله غريبة، يظهرلي ماذابي ما عادش نحكي على التوانسة خاطر ديما نبدا موش فاهمة

أما الحاجة الباهية و جديدة فل بوست هذا هو اني القيت بحث، عملوه اخصائين، د بسيكياتر، معناها طبة، قارين 11 سنا بعد الباك بخلاف لكسبرينس، البحث موجود في البلوغ هذا، متاع رئيس قسم علم النفس في منوبة، معناها تو صعيب شوية بش انقلو شمدخلو ولا شي همو، ولا شنوة يفهم منو

البحث يقول إنو:

ـ 83% م الرجال في تونس يحبو على مرا فيارج

ـ 77% يعتبرو إنو المثلية الجنسية حاجة مش مقبولة

ـ برادوكس و سكيزفرانيا : واحد على ثلاثة يقول إنو مارس الجنس و لو مرة واحدة مع راجل

ـ و مبعّد يحب على مرا فيارج ـ

معناها : ثلث الرجال في تونس عندها تجربة أموسكسيال، كان قالها النوري بوزيد ولا غيرو راهم حرقوه في الشارع،

البحث الحق يظهرلي يضر بسمعة تونس و سمعة رجالها، مزمرة شوية

ـ اللذة الجنسية عند الرجل تدوم دقيقة و 13 ثانية (البحث ما يذكرش إنو القذف السريع، إلي هو يعتبر مرض نفسي، يدوم بين 1 و 60 ثانية، معناها التوانسة موش بعاد باش يكونو، جنرلمون، مرضى الكل، عمال تتزمر على سمعة تونس، تو أي واحدة غاورية باش تاخو تونسي يوليو صاحباتها يتمنيكو علاها، حتى مسكين إلي يحب يورق ولا حاجة ما يلقاش، كان يتعرف بحث كيما هاكة حتى ملتوريست باش تولي فر فر :)

ـ 67% من الرجال العزّاب عندهم علاقات جنسيّة من المخرج مع بنات غير متزوّجات و ذلك للمحافظة على العذريّة (الجسدية بالطبيعة)

مانيش باش نكمل خاطر زايد، هاو عندكم الرابط و شوفو حقيقة الممارسات الجنسية عندنا، تحليلها لازمو 20 سنا قراية، إلي قالوا بوزيد حتى شي قدام لحقيقة (مثلاً إنو الرجال احسو رواحهم على راحتهم أكثر مع المومسات و موش مع نساهم)

البحث يحزن القلب، هذاك علاش يظهرلي أبحاث كيما هكة موش موجودة برشة، و حتى كان موجودة موش معروفة، خاطر تعاسة عظمى، ميزيرية جنسية تنعكس على الجو العائلي و خاصةً على الشارع التونسي، العنف اللفظي بصور جنسية مقرفة هي الحاجة الوحيدة ألي قادر عليها التونسي تو، العدوانية الشفوية إلي يتعرضولها النسا كل يوم في الشارع و الكار و المترو ماهي إلا نتيجة الكبت الجنسي إلي يحكي عليه البحث،

زايد راهو، أحنا من أتعس إلى أتعس، و الحل الوحيد هو إنا نعرفو المشكل وين بالضبط فماش ما إنحسنو حتى شوية، خاطر هكا باش نندثرو

إلّى تسرق تغلب إلّى يحاحى و من عامناول موش مالسنا

2010-11-04T01:57:00.001-04:00

البوست لخّر إلّي كتبتو على الفيديو متاع النوري بوزيد ولي يحكي على الامنوبلاستي (خاطر كل شي عندو إسم علمي موش vulgaire)

ذكرني في بوست كتبتو مرة، عام ناول، على شكاير العذرية إلي يبيعو فيهم الشناوة في مصر و سوريا، و عملو ديجا ضدو جروب في فايسبوك، عادة قلت إنذكر بيه فماش ما شاب تونسي تجيه فكرة جهنمية و يولي يستوردو و يغرق بيه السوق و هكة إنجمو انقلوا إنو سنة الشباب كانت بلفعل خلاقة و فتقو فيها الشباب مواهبهم و الشابات زادة ما إتخلفوش على الموعد بكل امن و أمان و بارخص الأسوام.

عامناول كتبت البوست بعد ما مرا غبية (وين حيها زعمة) حطت الرابط، و قلت إنو العذرية بش تولّى تتباع في البكوات، أندسترياليزي معناها، من المعمل إلى المستهلك و هذا ما نتصوروه بش ينمي من عدد المستهلكات،

ما نعرفوش أما كان تصنيع العذريات ترافاي أ ل شان ولّا كل قطعة تتخدم وحّدها، الحق صعيب شوية تكون خدمة متقنة، على خاطر خدمة شنوة و يزيد السعر مناسب جدّا، ما يطلع كان ترافاي أ ل شان، على بعضو، آلاف الأغشية في باكوات، صالحة للإستعمال الفوري، اشري، حل، حط، لوح، الكلو بسترالله، بالطبيعة خبر كيما هكّة بث الرعب في قلوب الرجال على خاطر خايفين مالغشّة، مساكن، عزو بيا، الحق تجي تلوم تعذر، الواحد بعد ما يدور و يعكل و يولي سنغور عاد، و يفرق بين العفيفة الشريفة النظيفة، إلي راسها مل قعة ما تهزوش (معدلة هكاك، نهارة كتبان الصداق تقول نزلت على فلسة، تهز راسها، تتحل عقدة لسانها و يا لطيف و برة) و الفاسدة حشاكم، إلي ما تصلح كان إل ها كلحاجات، وقتها هو يجنّد أمّو و إخواتو و أناثي الفاميليا الكل بش يلقاولو لمرا المناسبة و يزيد يتحل في المصروف، امالا بساهل هوة بنات الفامليات، قد ما الفاميلية كبيرة و باهية و ناس طيبين قد ما تكثر المواسم و الأعياد، إمّال مطلوبين راهم، على شكون يدّللو، علّى يدفع أكثر و برّة، و تو عاد أحنا مانا أصالة و تفتح، الموضة الجديدة ولّات قهاوي و روستورونات، و يكمّلها صالة و جوقة و زازة و اسمع يلّي ما تسمعش، تحبو بعد هذا الكل تطلع السلعة مضروبة و يزيد بأرخص الأسوام، ياخي س نورمال الرجال يتغششو، جات كمشة شناوة طيحت لنفستيسمون الكل في الماء معناها خسارة الميت و خسارة الكفن، والله موش معقول، الواحد حاطط الملايين و ف لخر تتمنيك عليه شريكة حياتو بخمسطاش دولار فقط،

عندهم الحق بصراحة يقولو لا للنوري بوزيد وللي عامل فيلم مسميه إيمان ناسيونال، حقو سماه إحباط ولا إكتئاب ناسيونال، و هوما زادة ما همش بش يعملو حتى مزية على النساء بافلام كيما نهك، ت أحنا ديمة مستترين، علاه لفضايح، يحبو يقضيو على لعروسات، ولي عندو صالة أفراح، ولي يكري فالكراسي، ولي تكري ف الروب، والحجامات مساكن باش يجوعهم على زوز أفلام، عيب راهو،تحبّو رجالنا الأفذاذ يقولو فيها ووه و يسكّرو لندوستري، خلي لعباد تاكل خبزة و إسترو ما ستر الله و كهو

،ولّى بالكشي زعمة بش نحجّو على يدين الشناوة و نفهمو أخيرا إلّى العذريّة ماهي إلّا منتوج ثقافي واليومة ولّى صناعي (يتخدم في الصين، أمّ بالغلوباليزاسيون موش مشكل، 48 ساعة تلقى بجنبك آلاف الباكوات)، و نجمو نتخلّاو أخيرا عنّو ؟ و نفهمو خاصّة إنّو الأخلاق و التربية والنزاهة و الشرف ماهومش مربوطين بجسد المرأة ؟ تقول نوال السعداوي : "هل الشرف هو مجرد أن يحافظ الإنسان على أعضائه التناسلية، هل البنت الشريفة هي تلك التي تحافظ على سلامة غشائها و لا تحافظ على سلامة تفكيرها و صدقها و قدراتها على العمل و الإنتاج في الحياة ؟ (...) هل من الممكن أن يكون الشرف صفة تشريحية يولد بها الإنسان أو لا يولد؟"

بالقطع لا، ما ينجمش يكون شرف لمرا بين ساقيها، شرف لمرا في عقلها و خدمتها و أخلاقها، بالضبط كيما شرف الراجل، و الرجال إلّى مازالت تربط شرفها بطرف دم هي إلّى تحاحي و هي إلّى تجبر لبنات بش تسرق و تتحايل و تستعمل جميع الطرق المتوفرة في السوق بش تهبّط قطرتين دم يضمنولها السعادة الإجتماعية، على خاطر أي مرا تعمل هكة ما تنجمش تكون سعيدة بينها وبين نفسها، أقل حاجة باش تحقر الراجل إلي تعيش معاه بما انو تمنيكتلو على عقلو مالنهار لول متاع العرس

النوري بوزيد أو دخلنا دجا في حيط

2010-10-28T00:54:00.009-04:00

والله حتى كيف الواحد يبدا ما عينوش ينطقوه في هالبلاد، تو لي مدة ساكتة و داخلة ببوشتي و ما عيني لا في بلوغ، لا في فايسبوك، لا في تويتر، حتى مل الراحة ارتحت، أما لا حال يدوم، اليوم فما كان الغزول لزني و برة.

تفرجت على فيديو متاع النوري بوزيد يحكي فيه على فكرة فيلم يحب يعملو أما قالولو لا، الفيديو تدور على فيسبوك، نتصور أغلبيتكم شفتوها، الفيلم يحكي على البكارة قال هو، معناها عذرية، معناها بالعربي فرجينتي :) حتى إلي ما يفهم حتى كلمة بالسوري يعرفها هاذي على ماهي حاجة مهمة جداً انقيصو بها شرف لمرا و عايلتها و بوها و أمها و خواتها و القبيلة و من هب و دب، في بلدان أخرى ( و ممكن في تونس زادة، ما دام حت شي ما عاد يجينا غريب و نلبو في نداء العصور الوسطى، تطيح علاها لرواح)،

الفيديو في حد ذاتها غريبة، معناها الفيلم يترفض على خاطر باش يحكي على الطبة إلي إستغناو ؟ ولا خاطر باش يحكي على التخلف الذهني متاع الرجال التوانسة إلي لا يزي يخليهم يحبو على طفلة فيارج لا يزي يصدقو إلي القاوها ؟ ممكن المشكلة تكمن في أنو باش ينتقد المكاتب و النظام التربوي ككل إلي موش مواتي الذكور و في عوض ما ينميلهم ذكائهم، يركز على بهامتهم و يطلعو كهول ناقصين برشة عقل ؟ على خاطر بصراحة غريبة برشة إنو الموضوع هذا يكون تابو في تونس، معناها ما يتحكاش فيه.

عام 86 ، بالضبط 24 عام ال تالي نوري بوزيد حكى على إغتصاب لولاد الصغار، البيدوفيليا عنا ولات أرحم من موضوع العذرية ؟

بالله تو على شكون نكذبو ؟ مانيش مصدقة, إلي إنسموه أحنا الترقيع ( و لعباد الكل تعرف شمعناها ) موضوع تابو ويزيد ننكرو وجودو ؟ كيف قريت شوية من التعاليق إلي على الفيديو ما صدقتش كان لعباد هاذم بجدهم ولا يتمقصصو ولا شنوة ؟ ما فهمتش كان هذا الكل إتبهنيس ولا بهامة ولا شنوة ؟ ديجا إلي إمهبط الفيديو إمسميها

"الى متى السكوت على من يشوه سمعة تونس"، معناها تو واحد مخرج محترم كيما النوري بوزيد يشوه في سمعة تونس على خاطر يحب يحكي في موضوع موجود، حقيقي ومعاش (و هذاك علاش التلامذة متاع الطب الكل يحبو يعملوا جينيكو، خاطر
يدخلو برشة فلوس بشوية تعب)
حتى واحد ما يحب يعرف كيفاه الفيلم ترفض ؟

ما جا البال حد كيفاه النوري بوزيد يذكر إسم فريد بوغدير وعبداللطيف بن عمار وشنوة يقصد ؟
حتى واحد ما ستغرب وخمم في مصداقية اللجنة ؟ وشنية أصلاً اللجنة هذي ؟
الامور هذي ما تهم حد ؟
أمور مجتمعنا و ثقافتنا وسينمانا ما تهم حد ؟
فالحين كان في السبان، منهم واحد قلك يهودي، خاطر بالطبيعة يهودي سبة
الجمعة إلي فاتت مشيت إل سينما 3D
تفرجت في فيلم اسمو Hubble
إلي هو تلسكوب ركبوه الامريكان في السماء عام 90، يدور حول الأرض مرة كل 100 دقيقة ويبعث تصاور متاع النجوم ولكواكب الأخرى،الفيلم تصور وقتلي بعثو د أسترنوت باش يصلحو منو قطعة، بين هواء و فضاء بالحق، هوما مسو الفضاء، مسوه بالفعل، وأحنا باقي حايسين بين ساقين النساء

صورة من الفضاء

هل أتاك حديث السبيطار ـ الحلقة الثالثة

2010-08-31T21:44:00.002-04:00

- و كان جينا في بلاصة أخرى مثال (نجمو نوضحو هوني إلي الحديث هذا قاعد يدور في سبيطار في الشمال الغربي)، كان قوتلي في الجنوب، في الجنوب، باش يشد يعذب فيها و يدنلها و خمسة أيام رابطها، ما تجيش في راسي ديركت هال لحكاية هاذي

- علاه، شنوة الفرق

- فم فرق

- فسرلي

- نفسرلك، على خاطر في الجنوب

- إنت ولد الجنوب

- أيه، أنا ولد الجنوب و نعرف شمعناها الجنوب، ما تجيش ديركت في راسك هال لحكاية هاذي، علاش، على خاطر ما عندهمش الظاهرة متاع القحب حشاك، ما عندهمش ظاهرة كبرى

- لنا فم

- لهنا فم

- الفميليا متاعك إنت ولا الفميليا متاع مرتك، تعرف مرتك منين خارجة، من آن فرقة خارجة، نعرفها كان فيها ولا ما فيهاش، مرتي أنا نعرفها منين جايبها، من آن بلاصة، شنوة عايلتها، و شنوة هوما، و شنوة خالتها، و شنوة عمتها، نعرفها شنوة، هنا، عندهم كيف كيف، معنتها مشات معاك، ن... معاك، شاخت معاك، و خطفت الدورة، عندها ك صبلي نشرب

- بربي

- والله العظيم

- شي كبير

- ما تخممش حتى طرف معنتها، مرت راجل، تبدى عليها ولا تبدى عليك، شاخت معاك، رقعة صحيحة، معنتها لا تخمم ل في ولدها، لا تخمم ل في بنتها، لا تخمم ل في راجلها، ما تخمم في حد، ما تخمم كان في الوقت هذاك بالضبط باش تن... كهو و مبعد تمشي

- امالا إجيوك فرص إنت

- خويا الله يسترنا يا ولد عمي

- فم معناها حاجات

- فم فرص، تجيني فرص، امالا ما تجينش، تجيني ولد عمي، أما أنا عندي مريتي سمحة باهية و عاقلة، و نمشي في النظافة

- تحبها ولا ما تحبهاش ؟

- نحب مرتي أنا كهو

- باهي، تو إنت كلامك فيه، بالنسبة لي، فيه الصحيح و فيه حاجات مانيش مقتنع بيهم، ما إنقولش غالط، أما بقى كيف إنت تكلمني هكة، سورتو كتقولي الراجل يتوب و المرا لا، بالنسبة ليك إنت، المرا و الراجل، وقلتهالي، ما همش كيف كيف

- موش كيف كيف

- هاي المرا، يا خويا، ولات طبيبة، ولات تقري، ولات تشد سرفيس كامل

- شوف وين مشيت إنت

- امالا، هذيك مرا و هذيك مرا،

- لا، لا

- ما قلتش الزوز حاشاك ق...، قلت هذيك مرا و هذيك مرا،معناها كيما هذيك مرا بمخها و قرات و تعلمت و شادة سرفيس و تحكم في الرجال بمخها و بخدمتها، كيما لخرى زادة تنجم تكون هكاك، علاش إنت قلت لمرا...

- ما تنجمش تتوب

- هاذي...

- فم وحدة، آش قولك...

- فهمتني شنوة نقصد الساعة ولا لا

- أيه فهمتك، فهمتك. حشاك فم مرا والفت، إلي توالف و عندها مالصغرة، مالصغرة خلاص، توالف بهاك الشي هذاك، تكبر، يكبر معاها، يوليلها كيما المرض، و زعمة في تونس كاملة ما عناش حشاك طبيبة قحبة...

هل أتاك حديث السبيطار ـ الحلقة الثانية

2010-08-24T12:59:00.003-04:00

كل شي وارد معناها

- كل شي مل لمرا : واحد على واحد تلقاه عندو مرتو و عندو صاحبو، و صاحبو هذاك تلقاه مدروبلو في مرتو، كل مرة إبينلها حاجة، كل مرة حاجة كاني بنت أصل تجبد روحها و تجبد راجلها. ما تقولش راهو بيه و عليه، أما تقولو راني ما هضمتوش، ما جاش على بالي، مانيش مرتاحتلو، و فم إلي تحاول تتقرب منو، وينو فلان، هيا نمشيو بحذ فلان، هيا نعملو قهوة مع فلان، بالنسبة للمرا، لمرا هي الفتنة، أكبر فتنة في الدنيا هي لمرا، حط في بالك، مذكورة في القرأن، الراجل مهما تكون صفتو راهو يدور يدور يدور و يرجع يبات بحذ مرتو و صغارو، و الراجل يدور يدور، يعمل، و يجي يخسر عليها دوش، شوية صابون، يخرج هك يعمل، أما لمرا هذيك تدور تدور، تقعد ديمة مرنخة و تجي ترقد مع راجلها

- اللطف...، هو باهي الحوار، الواحد...

- أيه، عاد شبيه، لمرا معناها ... يقلك ساعة ساعة، الناس لكبار كيف إفدلكو، يقلك ياخي هذا ولدك، يقلك والله كان صدقت أمو (ضحك)، ما يقولوش كان صدق بوه

- امالا، الحل و الربط بيدها هي

- الحل و الربط بيدها هي

- أي، زادة، فم حاجة ما تنسهاش، إنت كان بش تدخل ملول، مع مرتك، ولا مع لمرا إلي بش تاخذها، بش تدخل

- أي، زادة، فم حاجة ما تنسهاش، إنت كان بش تدخل ملول، مع مرتك، ولا مع لمرا إلي بش تاخذها، بش تدخل بالدوانة، و تخمم إلي هي باش ت... عليك نهار من النهارات، الثقة تنعدم، ما عادش

- لا، موش هذا، ما تخممش إلي هي باش ت... عليك، ولا باش تعمل ولا ما تعملش، الواحد يعرف مرتو، الثقة هذيك صعيب، ما هاش ضربة وحدة، الثقة بصراحة ما نسيبهاش، بصراحة مرا راهي، الواحد ما يسيبهاش ضربة وحدة، و الشك، معناها موش باش ينحي الشك من راسو جملة، الراجل راهو ديمة عندو حويجة في راسو، مهما تكون الصفة و ما يسيبش الماء على البطيخ

- لا هك و لا هك

- الواحد ما يسيبش، والبنت أصل بنت أصل، المحترمة و بنت أصل، بلحرام و كان إتحوطها في كازرنة، و إلي تحب تعمل تعمل، حتى كان تربطها موش بالسلاسل، حتى كان تحطلها شرلية في متاعها، زايد...

هل أتاك حديث السبيطار ـ الحلقة الأولى

2010-08-22T22:10:00.007-04:00

هذاي حديث وقع بين عامل في سبيطار و طبيب،ما هوش خيال خاطر خيالي للأسف موش واسع و خلاق للدرجة هاذي، انا ما زدت حتى كلمة، خلطلي تسجيل إكتبتو، انقلكم بش إنحطكم في الاطار إنو الهدرة تجبدت بعد ما مرا أو بل أحرى طفلة صغيرة، عمرها 18 عام، عروسة جديدة، وصلت للإستعجالي واكلة طريحة، محروقة، و شعرها مقلع من جذورو، معناها من عروقو، ياخي العامل و الطبيب بداو يحكيو في الموضوع، ثمة برشة كلام زايد، نحيت منو خاطر موش مهم و لا يزيد و لا ينقص في موضوعنا :

- لمرا كتذوقو مرّة، ما عادش، تعاود

- حتى الراجل زادة

- لاالراجل يتوب، يتفاداها لحكاية هذي، والراجل كيلقى مرتو باهية معاه و تلبيلو الطلبات متاعو الكل، وِلّي يطلب يلقاه في الدار و يلقى روحو مرتاح و شايخ ما نتصورش كونو يمشي مع وحدة أخرى

- تو سامحني، إنت، معناها بالنسبة ليك لمرا مرا والراجل راجل

- لمرا مرا والراجل راجل، هذاي هو

- لا كيفاش هاذم الزوز بنادم (بني آدم)، موش واحد حيوان و واحد إنسان، لا الزوز بنادم، الزوز عندهم مشاعر و الزوز يحبو، حتى لمرا كتلقى رجلها موفرلها كل شي، يحبها و لاهي بها و يبشبش بها ما تلوجش حتى بلاصة أخرى، صدقني، حتى كان ذاقت مرة

- كتذوقو مرة، ما عادش

- هذاك في مخك إنت

- تولي تعاود و راسك إنت تعاود

- في مخك إنت، حتى الراجل يعاود، ما ثماش ما أضعف مالراجل

-يا ولدي موش كيما لمرا كالراجل

- بالله كيفاش، فسرلي، والله نحب نفهم راني

- بالنسبة ليّ انا موش كيف كيف، على خاطر الراجل كيف يغلط ينجم يبطل، ينجم يندم ، ينجم يعمل ياسر حوايج، لمرا قتلك ما توبش، بالنسبةللمرا، حشاك، إذا مشات مع واحد، و رقدت معاه، و شاخت معاه، واحد آخر غير راجلها، تلقاها عندها سبب، يا على لفلوس، يا راجلها موش يرقد معاها ديمة، موش يلبَيلها في الطلبات متاعها، لمرا تبقى ديمة ناقصة يا لفلوس، يا كانت مضروبة في واحد قبل, يا تحب، ولا ثمة مرا تعشق، تحب تشيخ مع هذاك، و تحب تعمل...

- نحي علينا لمرا إلي تعشق الرجال و نحي علينا لمرا إلي تحب الشي هذاك بركة، إنت قلت كلمة تو، قلت راجلها موش ملبَيلها طلباتها، معناها إنت تقول لمرا عندها رغبات زادة، انسان، عندها رغبات ولا لا ؟

- أي نعم، علاش لا

- علاش امالا تقول الراجل يتوب وهي ما توبش

- الراجل صبور راهو

- انا ما شفت كان الرجال تجري ورى ز... (في الجمع :)، حشاك، ثمة كان هوما

- كان الرجال ؟

- كان الرجال، كان مرا يطيحها راجل، الكل يطيحو عليها مبعد، إلي يطيحها لول شكون ؟ مرا زعمة ؟ ماو راجل، كان كسرها، كان عمل آش حب، ماو راجل

- اناهو الراجل إلي شفتو يبدى على لمرا، إنت ؟

- والله ثمة برشة

- يبدى عليها ؟ شوف مهما يكون الراجل، ما يبداش على لمرا إلا ما تكون طايبتلو، عارف روحو شنوة قاعد يعمل. إنت ما تجيش تبدى على مرا ما تعرفهاش، ما تجيش تبدى على مرت راجل عاقلة و متربية، هذاي من باب المستحيل، الراجل يحشم و الراجل نظيف، الراجل حتى في السكس متاعو تلقاه نظيف، لمرا موش نظيفة، مهما تكون الصفة موش كيما عقل لمرا كيما عقل الراجل، لخمج حشاك متاع لمرا موش كيما نظافة الراجل، لمرا هي إلي لازم بش تعمل حاجة، بش تعمل أقل حركة بش تطيّح الراجل هذاك، مثلاً إنت في كرهبتك متعدي، ثمة وحدة محترمة، واقفة تستنى في تاكسي، وقفتلها إنت, طلعت،قدر عليها ربي طلعت معاك، عسلامة عسلامة، إنت تشوفها تلقاها متربية تلقاها عاقلة، لبستها محترمة، تحسها كوني, معنتها محترمة، باهي، تنجمش تعمل حاجة ؟

- هو تنجم تعمل حاجة أما تشوف الجواب متاعها

- شفتش ؟ املا، هي ساكتة

- زعمة كان ترمي يديك إنت

- صعيب، تنجم ترمي يديك، أما هي محترمة، ترمي يديك تقلك سامحني عيش خويا هبطني

- صحيح، كل شي وارد...

هاذم 5 دقايق كهو، التسجيل فيه 20 دقيقة،و ما خفي كان أعظم, إنكملهولكم المرة الجاية...

عصرالحَب في زمن الكاكتوس

2010-08-19T11:06:00.000-04:00

إل يوم قمت إمخر خاطر إل بارح إرقدت إمخر، نتفرج عل مسلسل حشاكم، لعباد إل كل قالولي إه بّ ل، إل كلو واقع في واقع، هو من ناحية واقع، واقع، ثمة حاجة ما عادش تقع فل لبلاد، من صغيرها لكبيرها، قد ما الرقعة الجيوغرافية صغيرة قد ما إلواقع كبير، هو مسلسل في وسط مسلسل، حبكة تلفزية رائعة، يعطيه الصحة المنتج،لا سامحوني نقصد المخرج، أم شكونو المخرج، هو نفسو المنتج ؟ خاطر في لخّر إحطو إسم المنتج موش كيما فل المسلسلات المصرية إلي انشأنا عليها و ترعرعنا في كنفها، زعمة يقصدو إلي المهم فل الحب (الحَب موش الحُب، ما تفهمونش بالغالط يا جماعة)، هو الحق إمواكب العصر في برشة حاجات، منهم هاذي، أوفى عصر الحُب أو احنا تو في عصر (الحَب لل غافل أو برة، في نطاق النزعة البيداغوجية امتع لبلوغ)،

ثمة حاجتين ما فهمتهومش مليح في المسلسل : المسرح و الشوكو. زعمة النزعة البيداغوجية للمسلسل اتحب إتقلنا إلي المسرح للخاسرين فقط ؟ معناها جماعة المسرح سوكرجية، يتكيفو لين يضربو كانسر إمتاع إرواري (هذا إلي بش اصير حسب تكهناتي و خبرتي العميقة بالمسلسلات المصرية و هوني الحبكة التلفزية فاشلة شوية ما دام ضاهر شنوة بش يصير ولّا بالك جوست في إطار التوعية إنّو التدخين مضر بالصحة) و بوهاميّين و فرنك ل و يصرفو أعليهم صغارهم و ما عندهم حتى نوع من المسؤولية و حتى مل إبداع شوف و شوف، ما جاب شي ؟ هذا شنوة افهمت انا، أما باز موش هذا المساج، نعرف روحي ديمة نيتي إمقعمزة، هو لازم لازم احب اقول إلي إلمسرح هو الكل أو إلي أحسن الممثلين جايين مل مسرح، بعدلي إمرمدين فل كيران و يعرفو إلواقع و ممكن زادة المنتج يحب يشري المسرح البلدي و يبسّس فيها لجماعة:).

ثاني حاجة ما فهمتهاش هي إشوكو، كيفاش يحكي أعلى روحو وعلى المنتج ولا المخرج ولا الزوز امع إبعضهم، هذيا يتسمى مجالومنية أو بالعربية جنون العظمة، لمرض هذا وحنا نعرفوه مليح يصيب العظماء، امرض بيه في السابق نابليون و هتلر و فرانكو و برشة اخرين، عافنا و عفاكم الله، تو الجنون أو ضارب فالبلاد (ماهو خاطر إنعرسو برشة بينات بعضنا)، هاذي مفهومة أم العظمة (عظَمة موش عضْمة، ميساج خاص بالصائمين إلي اراو في بريكة تو) منين جاتهم بربي، إنخاف إنهار نتعدى أعلى حلق الواد نلقى تصويرة سي سامي و الشوكو (3 ميترو أعلى 3 بالطبيعة، حجم وطني، ما نلعبوش رانا ب التقاليد الوطنية) معنقين إبعضهم و إمنيو فينا اب تونس الجديدة إمتاع الحَب موش إمتاع المسرح, حَب للجميع و للقاصدين إليه سبيلا.

و كلعادة، خاطرني أصيلة أو متشبثة بالعادة نحكيو شوية أعلى انسي فلمسلسل(النسي معناها النساء، بكسر الالف أم شوية برك، معناها مش بل i بل é أما مش كيمابالسوري، حاصيلو انشالله تدخل عن قريب فل API و اتكون من جملة الانجازات الرائدة لبلدنا الصغير و مساهمته الفعالة في تقدم الأمم)ولاّ لالِ ؟

:))

في المسلسل ثمة زوز أنواع إمتاع نساء السافرات العاهرات إلي ما يصلحوش و هذا على الرغم من صغر سنهم (لازم يتولدو هكاكة) و الصالحات العاقلات إلي متربين فلمسرح إلي ما فيشي حَب، اللولانين امتع ديار و فساد، اللهم اعفينا و بعد أعلينا لبلاوات (و بالله ردوا بالكم أعلى بناتكم اصغار منهم خصوصاً خاطر حتى كان انتوما إتربيو و إتعسو أعلى بناتكم زايد راهو ما يطلعوا كان بنات كلب، في أصل المرأة بصفة عامة)، الثّانين لمزمرين امتع خطبة، انا اوصلت الغادي، وقتلي البطل يحب اقابل سي حسن باش يخطب، قطوس في شكارة، و هو و زهرو، أما normalement كل شي بش يمشي إمليح، اللهم كان إلأصل الخبيث للمرأة بش يخلّاها تدور أعلى الخطيب المسكين و اتولي حتى هي اتحب أعلى الحَب

انشالله رمضانكم مبروك وكل مسلسل كاكتوسي و نحن بخير

Le monde entier est un cactus

Il est impossible de s'asseoir

Dans la vie, Il n'y a qu'des cactus

Moi j'm'pique de le savoir

Aïe! Aïe! Aïe! Ouille! Aïe! Aïe! Aïe!

Dans leur cœur il y a des cactus

Dans leur portefeuille y a des cactus

Sous leur pieds, Il y a des cactus

Dans l'heure qu'il est y a des cactus

Aïe! Aïe! Aïe! Ouille! Ouille! Ouille! Aïe!

Pour me défendre de leur cactus

A mon tour j'ai pris des cactus

Dans mon lit, J'ai mis des cactus

Dans mon slip j'ai mis des cactus

Aïe! Aïe! Aïe! Ouille! Aïe! Aïe! Aïe!

Dans leur sourir' il y a des cactus

Dans leur ventr' il y a des cactus

Dans leur bonjour, Il y a des cactus

Dans leur cactus il y a des cactus

Aïe! Aïe! Aïe! Ouille! Aïe!

Le monde entier est un cactus

Il est impossible de s'asseoir

Dans la vie, Y a des cactus

Moi j'm'pique de le savoir

Aïe! Aïe! Aïe! Ouille! Aïe! Aïe! Aïe!

Aïe! Aïe! Ouille! ...

جديد روتانا

2010-07-07T13:38:00.001-04:00

ماحلاها روتانا ! المرّة لخرى حطّيت نتفرّج على روتانا متاع لغنا، الكلها كليبات، يشبهو لبعظهم شويّة، لغنايات الكل كيف كيف، نفس الريتم، سعّات يظهرلي ما زلت كيف سمعتها، نزيد نثبّت في المغنّية نلقاها كيما إلّى تعدّات قبلها أمّا بلوندة أكثر، والكليبات الكل فيهم بحر وواحد بوقوس ووحدة لابسة شويّة برك

و ب.م ولّا مرسديس

بين لكليب متاع هاذي

ولكليب متاع هاذي

يجي الإشهار هذا

غزرتلي صاحبتي

و قتلي : موش لابسين سبتة (ما زال فمّ عباد تخمّم هكّة

كمّلنا تفرّجنا ياخي طلع الموضوع

مخالف لتصوّراتنا

الحق السبوت في حد نفسو من غير ما نحكيو فيه، أمور أخرى، أمّا تواجدو بين الزّوز كليبات هو إلّى

!!!ما فهمتش المقصود بيه

الفنتازم الجنسي

2010-06-10T21:56:00.000-04:00

الفنتازم الجنسي حاجة طبيعية في الإنسان، هاذي بديهيّات جوست بش نلقى الفتلة،
مادام أحنا في المجتمع هذا، طبيعي زادة إلّ الرجال هوما إلّ يكون عندهم د فنتازم و النسا لا بما أنهم موجودين للخدمة الجنسية فقط، من غير تعميم بالطبيعة أمّا كان نحلّلو السّلوك الجنسي ننجمو نلقاو برشة ثغرات ترجّع لمرا أداة لمتعة الرّجل، حتّى، في بعض الأحيان متعتها ماهى إلّا تحسيس لرّاجل إنّو قادر بش إوصّلها للأورقازم،
التمويه النسا الكل تعرفو و مارستّو في وقت من الأوقات، في مرحلة من عمرها ولّا من تجربتها لين توصل إل درجة من الوعي الجنسي و خاصّة الذّاتي إلّ يخلّيها تبعد عن الطرق الكلاسيكيّة إلّ ترضخ فيهم جنسيّا لرّاجل و تولّى تشارك المتعة، معناها تاخو و تعطى و ما تكونش عنصر سلبي
بما أنّو بالفعل ثمّ تطوّر في العلاقات الجنسيّة و الجنس اليوم ماعادش واقف على الإنجاب، ثمّ "تطوّر" زادة في الممارسة الجنسيّة، كلمة تطوّر نقصد بيها تغيّر
وولّات ممارسات آمس في الأيّام إلّى موش مقبولة، اليومة حاجة شبه عاديّة، نقول شبه لأنّنا مازلنا بالأحرى رجالنا ما زالو يعتقدو إلّ ثمّ حاجات ما ينجموش يعملوهم مع نساهم و يعملوهم مع نسا أخرين، هذا موضوع آخر يستحق بوست وحدو
الحاجات إلّى ما يعملوهمش مع نساهم يولّيو في مجال الفنتازم،
واحد مل ل فونتازم هاذم و فمّ برشة عباد تمارس فيه خاصّة في دومان البورنغرافيّة هو إلّى ننجمو نترجموه بالقذف الوجهي، عملت دورة في قوقل ما لقيت شي، فهمت جوست إلّى فمّ أندوستري بورنغرافيّة كاملة متخصصة في هذا النوع من الأفلام و ويكيبديا تقول إنّو الجببنة مغرومين بالأفلام هاذي
السؤال المطروح هو علاش بالنسبة إل بعض الرجال الممارسة هاذي تجيبلهم متعة كبيرة و إلّى عمرو ما عملها إفنتزمى عليها؟
الوجه، في المجتمعات العاديّة موش متاع النقاب، هو هويّة الإنسان، الحاجة الوحيدة إلّى في بدنو إلّى يفرقو مل لعباد لخرين، في أرتيكل إسمو الوجه و القدسية،
الكاتب يقول
Le visage apparaît ainsi comme une capitale (capita) du
corps, une hiérophanie diffuse dont la perte (la défiguration) prive
souvent de toute raison de vivre en entamant en profondeur le
sentiment d'identité.
ويزيد يقول هوني
Le visage est le lieu de la reconnaissance mutuelle. Nous
allons les mains et le visage nus et nous offrons au regard des
autres le relief de traits qui nous identifient et nous nomment.
لكلمتين هاذم مهمين
La singularité du visage en appelle à celle de
l'homme, c'est-à-dire à celle de l'individu, atome du social, indivis,
conscient de lui-même, maître relatif de ses choix, se posant en
«je» et non plus en «nous autres».
البحث هذا يفسّر أهمية الوجه للفرد، هو إلّى يخلّينا نتكونو كشخصية مستقلّة و معبرة على آرائها ووجودها ككل، عمليّة القذف هاذي ماهياش محاولة لمحو الشخصية ولو لدقائق معدودة؟ الكاتب يقول إلّى الوجه هو إعتراف بوجود الآخر، طريقة الحب هاذي، كان هذا يتسمّى حب، موش حب لذّات على حساب الآخر؟ شمعناها تفسّخ وجه لمرا إلّى نرمالمون قاعد تندمج معاها؟ كيفاش يتمتّع الرّاجل بانتهاك شخصيّة لمرا؟ كيفاش حاجة كيما هكّة تنجّم تكون فنتازم و الرّاجل يتصوّرها قمّة اللذة؟
الممارسات الجنسيّة إلّى مالنوع هذا تدخل في إطار التحرّر من التابوهات و العقد المتعلقة بالجنس، معناها اليومة، مواكبة للإعتراف بوجود المرأة كعنصر فاعل في المجتمع، أي ممارسة جنسية موافقين عليها الطرفين تولّى مقبولة و ما تخصهم كان هوما، لكن في صلب التحرّر هذا نراو إلّ بطريقة أو بأخرى فمّ تعسّف على وجود المرأة مادام فم طمس ملامح معناها رفض تام لشخصيتها، لوجودها ككائن مستقل
هاذي ماهي إلّا مثال من برشة حاجات تصير كل يوم في الحياة موش الجنسية كهو أمّا اليومية زادة إلّى تخلّينا في صراع بش نمحيو، نفسخو و نستقواو على بعضنا بش نربحو لحظات نشوة بأنفسنا

L'article : LE VISAGE ET LE SACRÉ:
QUELQUES JALONS D'ANALYSE
David Le Breton
http://www.religiologiques.uqam.ca/no12/visage.pdf

يجيك لقضا يا غافل

2010-05-12T01:58:00.000-04:00

تو ليّ مدّة و أنا نحب نحكى على حكاية الصنصرة، يظهرلى إلّى ما عنديش جديد بش نقولو، إلّى ثمّ الكل اتقال و تعاود تقال موش مالمرّة هاذي لكن من تو برشة، و الحملات ضد الحجب كيف كيف ما هومش جدد، صارو برشة مرّات و نجحو في معظم الأحيان ـ دايور أول مدونة كتبتها كانت فى الحملة ضد حجب يوتوب و دايليموشن ولّى مشى ضحيّتها عيّاش، من وقتها علّق الصباط، خسارة، أمّا مستانسين بالخساير شي عادى ولّا، ديما داخلين في الخسارة و موش في الربح ـ كاينّى حملة سيّب صالح نجحت نسبيّا أكثر ملّخرين، هذا واضح من خلال لعباد إلّى ولّات تدخل للمدونة متاعي و ما كانتش قبل و كلهم جايين من مواقع و جرائد كتبت على الواب على صنصرة أنترنات في تونس و حطّو

معاها اللّيستة متاع المدونات

تحيّة و شكر كبير للوخيّان إلّى تلهاو بالحملة و نجحوها، يعطييهم الصحة و هذا دليل على قدرتنا بش نعملو برشة حاجات كان نحبّو

نحكي مع روحي في إطار تشجيع نفسي

و التخلّى على الإنهزامية

إلّى ترعرعت عليها متاع الله غالب و هاك ش فمّة و شتحب نعملو إلى آخره من فورمولات تشجّع على القبول بالأمر الواقع والرّكود الفكري والجسدى

هو الحق ـ بعد الصنصرة ـ لبلوق ولّا ناشط رغم إلّى أنا نكتب ممكن تدوينة في الشهر ـ ضاربنى الكساد التفكيري ـ هو كيف تصنصر كيف كيف على كليمة الشهر، من غير ما نخبّى عليكم حسّيت روحى مهمّة برشة و ذكيّة برشة و لمت على روحي كيفاش ما شلقتش بهذا من قبل و ضيّعت برشة وقت من غير ما نتحف العالم إب أفكاري النيرة

و عمرى لا حكيت على سياسة ولّا عل الهم الأزرق إلى صاير فى لبلاد ـ بوليتيك أخط راسي و اضرب متمكنة منها ـ

معناها أنا هربت مالسّياسة وهي جرات في جرتي، آش كون كيفى تره

يجريو في جرتى بش يصنصرونى، هاذ هي يجيك لقضا يا غافل

أنا موش مقلقة كان عمّار، زاد راسي كبر كيف قصّولى و لل المرّة السابعة ـ قرّرت بش نوقف هونى كيما لبلاد الكل ـ على التوالى إل كونت فايسبوك متاعي، غايرة بصراحة مل ب ت ب يظهرلى إلى هو خلق كونتات جدد أكثر منّى المدة لخرى ،

هاذم قالو يدافعو على الدين الإسلامي، هوما أمورهم يدافعو علّى يحبّو، أمّا ما فهمتش أنا شنوّة مدخّلنى، عمرى ما جبدت دين و لا حكيت على دين !! و عمرى لا جبدت سياسة ولا حكيت على سياسة !! زعم لعباد إلّى تصنصر و تقص تعرف تقرا ؟

بالك يتفرجو على التصاور و شافو فرج متعدّى على بسكلات يستخايلوه سيت بورنو يروّج لل أخلاق غير الحميدة ؟

زعم ك العادة كلها من فرج ؟ زعمة لل حد هاذا مرا تتكلّم تخوّف؟ زعمة للحد هاذا موضوع المرأة يخوّف ؟

ت أنا في بالى موضوع سوفت و سمباتيك، ياخي تونس موش رائدة في حقوق المرأة و تحب شكون يدافع على النسا؟

ياخي موش الإسلام يدافع على المرأة و كرّمها؟

شنوّة يقلّق فلّى أنا نقول فيه بش يدورو عليّ مع بعضهم؟

الإرهاب الفكري

2010-04-13T15:00:00.007-04:00

في بالي ما نيش بش نحكي علّى صاير على فايسبوك، ظهرلي تفوريخ و حكايات فارغة، سكرولي إل كونت متاعي أربعة مرّات و باقى عاملة فيها عزوزة ما يهمها قرص، برشة يحكيو على أهمية الموضوع في الوضع السياسي و الإجتماعي العام في تونس و أنا الحق موش مقتنعة، نخمّم إلّى هوما كمشة فروخ تلعب اب أورديناتور

اليوم خرجت فيديو متاع تكريز و بصراحة جاني شوك، زوز فروخ ما عندهمش شي في الطّاسة، يقولو في كلام متاع بهامة، مزينينو بطرف كلام زايد، كينّو لكلام الزّايد وسيلة تعبير مجدية كيف يبدا الخطاب فارغ و تافه و ماهوش ستروكتوري

حديث ما جاب شي جديد، و يتعرّض إل أشخاص معينين في عوض ما يجيب فكرة جديدة حتى ولو تكون متواضعة أمّا بلقليلة تغني نقاش، حتى مل كلام الزّايد فن راهو، كيف تعرف تستعملو في بلاصتو إ أدّى مهمتو و يكون بركوتون،نافذ، مؤثر معناها، كتبدى تطيّش فى لكلام هكّاكة يعطى عكسو، يطيّح من مستوى العبد إلّى يقول فيه و من مستوى النقاش و ينحّى أي شرعية تحب تعطيها لل حديث،

نتمنّى إلّ الميساج وصل و إلّ ممكن ليترارشويّة ما يتفهمش:)

وجه الشبه بين الفيديو متاع تكريز والحشرات متاع فايسبوك زوز حاجات: لعمر(الزّوز صغار في لعمر، هكّه يبان، أقل م ثلاثين يظهرلى) و الهمجيّة لمخلطة بالتفاهة ( بالطبيعة كيف يبدا الإنسان فارغ يولّى عنيف، شرس و ما ينجّم يعبّر على مقصودو كان بالطريقة هاذي)

الزّوز يقولو إلّ عندهم هدف فى إلّ يعملو فيه ومقتنعين اب فكرة معينة يحبّو يدافعو عليها، الخطير فى الموضوع هو طريقة الدفاع عليها، الزوز يستعملو الإرهاب الفكري و إقصاء الآخر،

بالفعل ممكن إلّى خطير إلّى قاعد يصير في العالم الإفتراضى، يورّى فينا إل سياسة القمع و الإرهاب قاعدة تجيب في جنراسيون متطرفة المهم عندها تسكّتك، تتصوّر إلى هي عندها الحقيقة المطلقة و تتهجّم على لخرين بش تفرض أفكارها

سيستام لقراية فى تونس مفتوح للجميع، صحيح لعباد الكل تقرا، أمّا شنوة تعلّمنا؟ تعلّمنا ننقدو؟ تعلّمنا نوصلو فكرة؟ تعلمنا نستعملو حجة علّى نقولو فيه؟ تعلمنا أحفظ و صب و ما تناقشش
السيستام ولّد الكبت، و الكبت الفكري و السياسي و الإجتماعي
خلّى تو صغارنا ما ينجموش يدافعو على فكرة من غير ما يعتديو على لعباد إل ما تشاركهم الفكرة أو المعتقد أو المنهج

نتيجة خمسين سنا خنقة، تو لازم نستانسو بالنوع الجديد هاذا متاع الإرهاب، مواكب عصرو

يظهرلى بالحق: المستقبل بش يكون أظلم ب برشة مالماضى و الحاضر

ما حطّيتش الروابط متاع الفيديو و الصفحات متاع فايسبوك على خاطر ياسر المستوى هابط بصراحة

هي... و هي

2010-04-03T00:33:00.000-04:00

هي: ماذا بيّ نهارنفهمك، بالله أحكيلى شنوما هالأولويّات إلّى تحكي عليهم

هي: نحب لفوياجات برشة، لفلوس إلّى بش نحطها في ميكرواوند ولّا ماشين أليفى ولّا تلفزة ولّا كرهبة و ما خالفه من سلعة تفسد و تتلوّح نفضّل نلمهم نسافر بيهم خير، نحوّسّ نشوف العالم لعباد، نتمنّى ذاكرتى ما تفسدش و بلقليلة الذكريات هاذى تقعد

هي : معاك، عندك الحق، ما هومش حاجات إجبارية أمّا ماك تعرف كيف يبدا عندك صغار بين تسخين البيبرونات و 3 ماكينات صابون تعملهم في النهار و هزّان و جيبان للمكتب، عذاب، هالحاجات الزايدة تولّى تعاون في تحسين عيشتنا

هي: هههه، مسكينة:) أنا بصراحة ما حاشتي بصغار، السماح، وين تحكيلي هكّة نترعب و نقول لواه، أهيكة لعباد الكل تجيب في الصغار، خلّيني رابحة راحتي

هي: وحّلتها في راسي؟ لا يالّ، شمدخّلني، أنا موش مسؤولة، أمورك، تحمّل مسؤوليتك، باش ناخو موقف، جيب صغار كيما النّاس الكل، و أهوك كيما النّاس و أقل من النّاس و خير من النّاس

هي: أيوه هو شنوة هردنا، لا ياللّ قلّك بيبرونات و 3 ماكينات في النهار، و أمبوتياج و هاو ولدك ضرب ولد المعلمة و إيجاها ملّوط، دبّر على روحك، آش لزّنى أنا

هي: أي ما تنساش لحديد زادة، والدوفوارات و هاو مرض و فاكسانات و طبة، أمّا جو شايخين

هي: أخطاني، حياتى هكّه باهية، نزيد نعيشها شويّة، كيف نبيّل و نفد مالحرية، نستبنى وليّد ولّا بنيّة من 5 سنين ف ما فوق، بالله سؤال حيّرني : لحديد لواه؟ ت صغار ديما اممرمدين زايد تحديد الدبش، على العينين تقول إنت؟

هي: ههههه، أعمل حتّى زويّز صغيرات تو تفهم لواه

هي: أووه، أنا لعصب ما انّجموش، يجعلنى نقوم بروحي،أمّا نخمم بالحق بش نستبنى، شقولك؟ ديما يقولو إلّى الصغار إلى يفوتو ال 5 سنين ما عادش يستبناوهم لعباد، مساكن بصراحة يحممو إل قلب، عاد ناخذ واحد ولاّ ثنين نربح فيهم ثواب، ت معناها

هي: تظهرلي صعيبة لحكاية، التنشئة الإجتماعية متاع الصغار المستبنيين لازمها برشة خدمة، و زادة لازمك تبدا مار تريزا

هي: اننجم نجيب صغار، ساهلة العمليّة، أمّا لواه نعمل كيما النّاس الكل،

هي: امرجتنى، اي شبيه مو اعمل كيما الناس الكل، علاش ديما تفركس بش ما تعملش كيما النّاس الكل، رد بالك، فدلك فدلك، ممكن تكون غالطة

على طول الخط،

برّ برك، تحب وليّد ولّا بنيّة؟ سمرا ولّا بلوندا؟ في كل الحالات لازمك تلقى فارس الأحلام قبل

هي: ما نعرفش، كيف كيف، ممكن بنيّة، سمرا خير، لبلوندات منعوتين بالبهامة، استنّى السّاعة،

ولواه الرّاجل، هتو نشري دبّوسة و برّة، تختار بالكتلوق

هي: :علاه؟ تنجم تلقى واحد باهي يطيّب، ينظّف، يحدّد، يتلهى بالصغار، ما يحبّش الكورة، ما يقعدش في القهوة، يحبّك برشة برشة ، يقول كان كلام حلو و يهديلك النّوّار مالفوق، ههههههه

هي: زعمة؟ نسيت حاجة مهمّة ياسر ذكي ومتثقّف، نحبّو يبدا يحدّد و يحكيلي على سبينوزا

هي: هههههه، ملّا فنتازم، فيق على روحك وين بش تلقاه هاذاي، في بالي بيك رزينة و بعقلك و عايشة في الواقع موش فى الخيال الواسع

هي: زعمة؟ ما ثمّاش؟ دوماج

هي: هو كل شي ممكن، سبحانو، على كل شيء قدير

بون، آش بش نعمل، ممكن فمّ حاجات اننجّم نتنازل عليها

هي: ايوه هانا جيناها، يظهرلى فيك إلى مشكلتك إنك ما تراش علاقة متاع مستقبل، تخمّم كان في الوقت الحاضر

هي: علاه؟ أنا الحق تو ما عادش نخمّم في الموضوع هاذا، كنت في وقت من الأوقات أمّا المهم تو بالنسبة ليّ هو مستقبلي المهني و كيفاش نخطّط إل مستقبلي وحدي

هي: ستوب ستوب، علاه هالكلام

هي: على خاطر هاذاك الواقع، موش قتلي فيق، نرا الواقع و نعمل بيه، مانيش بش نقعد نفونتازمى على فارس الأحلام

هي: أي باهى أمّا ما فيها باس كان تخطيطك يخلّى مكان إل علاقة جدّية

هي: أوكي، كان جا نعملّو بلاصة، أمّا ما نخليش بلاصة فارغة و بالوقت تكبر و ترصّيلي نقاسي فيها

هي: أعمل برامجك على روحك أمّا كان نهار تتعرّف على واحد مالازمكش تبدا كيما العوانس، جاك على غفلة و ما نجّمتش تتعامل معاه، لازمك تكون واقعيّة أمّا ايجابية، حياتك العاطفية مهمّة لازمك تتلهى بيها

هي: علاه؟

هي: بش تكون سعيدة

هي:علاه؟ ما نحقق السعادة كان بالعرس؟ فكرة مسبقة إنّو ما نجمو نكونو سعداء كان كيف نبداو اثنين، علاه اثنين و موش ثلاثة؟ شكون حدّد الرّقم؟

هي: ممكن

هي: و خاصّة بالنسبة لنساء، ونسمّيوهم بايرة و عانس، شنوة المذكر متاعهم الكلمتين هاذم؟

هي: شيهمنا فى الأسامى، تعرفني موش نحكي على هذا

هي: إل أسامي هاذي تعني إلّى لمرا إلّى ما يخذهاش راجل ما تسوا شي، تستمد قيمتها برضاء الرّاجل عليها مهما كان أقل منها، والعكس غير صحيح هذاك علاش ما ثمّاش مذكّر

هي: هاذي ميزوجينيا اجتماعية موش هذا الموضوع، أنا عليك إنت، ممكن تو ما حاجتكش براجل، أمّا بعد عشرة ولّا خمستاش ان سنا...

هي: علاش لازمني راجل واحد لل 40 سنا الجايين؟

هي: ممكن أسهل تو بش تلقى شكون

هي: معناها لازمنى ضمان لل 15 سنا الجايين ؟

هي: لا، نقصد إلّى إذا كان تلقى شكون تعيش أسعد

هي: برشة معرسين و حياتهم تعيسة جدّا

هي: و برشة لا، خسارة تقعد وحدك

هي: علاش بالنسبة لينا السعادة مربوطة اب عبد آخر، علاش ما نجّمش نعيش وحدي، نبرمج حياتى، نقرّر وحدي كان نحب نجيب صغار و إلّا كان نحب نستبنى صغار،

هي:

...

هي: الأصعب هو كونى نعمل هاذا الكل وحدي لكن أرتح، إلّى نرفضو هو كوني ناخذ إلى يجي بش ما يقولوش عليّ بايرة و بش نعمل كوفرتور اجتماعية

نحب نعيش حرّة

هي: تعيش أسعد معرسة، و إلّا لا، المهم موش وحدك

هي: هاذي فكرة اتأصلت فينا ملّى سماعنا إب بونا آدم و أمنا حوّاء، ولّينا ما نحققو شخصيتنا إلّا عن طريق الرّاجل ولّا لمرا، نراو رواحنا ثنين فى عوض واحد

أخطر حاجة هو إنّنا نختارو شريك الحياة على خاطرنا محتاجينلو مهما كانت الحاجة مادّية، عاطفية، جنسية ولّا اجتماعيّة

هي: آآآآه كسّرتلى راسي، يا بنتي أنا على خاطرك راهو، دبّر

راسك، آش لزنى حتى أنا ماهو إلّى يشتهي شهوة

يعملها فى عشاه

خلّينى نمشي نروّح بولدي مالمكتب ما انحبّش نبطى عليه

هي: استنّى نقلّك

...

هي: غدوة غدوة ولّا تو نطلبك في الليل، ماك تعرف الأولويّات

...

فرج يحوّس على بسكلات

2010-03-12T23:27:00.000-05:00

source : http://leclitoris.online.fr/index.php/elle-possede-le-plus-grand-vagin-du-monde/

المرأة التونسية على شاشة تونس7

2010-02-13T01:40:00.001-05:00

اليومة فادّة و روحي طالعة، قلت أحسن حاجة تفرهدني قناة تونس 7، نفضّلها على القنوات التونسية لخرى، بصراحة فيها نوع من المضحكات المبكيات صعيب يتوفّر في شانات أخرين، برّ عملت طلّة على دايلي مو

شين ـ موش نغزّل فيكم راهو، و بالعكس ضرنتو القرار رشيد، مخدوم و ذكي غير أحنا شعب نكّار و كركار و كعرار ـ حاصيلو نلقى برنامج علاء الشابي ( لازمو دروس سسيولوجيا و بسيكولجيا والحالة استعجالية) إلّى يجيب فيه النّاس و يحاول يحلّلهم مشاكلهم،

طفلة صغيرة عمرها 18 سنا تحب تعرف أمها الحقيقية، جابو لمرا، مسكينة جاهلة و زوّالية، قالت إلّى هي كانت معرسة و إلّى الطفلة في لحلال، بالطبيعة الموقف محزن و تعيس و هم أزرق، باش المنشط يهدّى الطفلة عيا و هو يقلها إلّى هي بنت حلال، شي يحشّم بصراحة، الموقف يعيّف، ميزيرا إنسانية، طفلة عمرها 18 عام معذبة حياتها الكل، أمها لوحتها و أهم حاجة إنها بنت حلال مش بنت حرام؟

وكان جات بنت حرام، شنوة نعملولها، تأسّفت إنو لحلال و لحرام أهم من العذاب إلى تعيشو لعباد إلّى في الوضع هذا

الحالة الثانية ـ تنجمو تشوفو التسجيل كان عندكم وسع بال و بروكسي ـ تتمثّل في راجل متفارق هو و مرتو ويحب يرجّعها، بش نطرح جميع المشاكل إلّى حكاو عليها لأنها ظهرتلي متاع أوائل القرن الماضي:

ـ الرّاجل عمرو 27 سنا وهي لازم أصغر شوية و عندهم بنيّة عمرها عامين

ـ بدا الرّاجل يحكي ـ إسمو محمّد ـ قال إلّى المشكلة إنّو مرتو ـ أميرة ـ لسانها طويل و ما تسكتش، يفدلك علاء و يقول هذا شيء عادي، النسا الكل هكّ :

ميساج امبليسيت1 :لمرا ما لازمش يكون لسانها طويل، لازمها تتعلّم تسكت قدّام الرّاجل ـ لأنّو راجل ـ

ميساج امبليسيت2: إذا كانك مرا و معرسة و تحب تحافظ على دارك و راجلك سكّر فمّك

تجي لمرا ـ أميرة ـ تظهر متربية و تتكلّم بالمعقول، تقول إلّى أبار الحب في الدنيا هاذي لازم حليب و دوايات و أساسيّات بش تعيش هي وبنتها، راجلها يصبح راقد ما يحبّش يخدم، موش مسؤول، المنشط موافق تماما إنّو هذا موش معقول وإنّو بخلي،

ميساج امبليسيت3: الرّجال قوّامون على النّسا و إذا كان الرّاجل موش كبابلي تولّى مرتو لسانها طويل و هذا يحقّلها، أمّا يجيب لفلوس و لّا موش راجل و يستاهل إنّو يتعامل كذلك

الرّاجل يضرب في مرتو، تقول إنّو ديما يضربها، أوّل طريحة كلاتها و هي عروسة 5 يام في الشارع، المنشط يسهلها : هو قال إنّو ضربك مرّة وحدة؟

ميساج امبليسيت4: كيف يضربك راجلك مرّة وحدة، ميسالش، عدّيها، أمّا موش واضح مرة في الجمعة؟ في الشهر؟ في العام؟ ماذابي نعرف شنية لفركنس المقبولة

المنشط يحب يعمل كنفرنتاسيون بين لكلام إلّى تقول فيه لمرا و إلّى يقول فيه الراجل، هو منحاز للمرا و يقولها بصريح العبارة ما عندو حتّى دليل، إحساس و برّة

ميساج امبليسيت5: لمرا كائن ضعيف مسكين محتاج لرّعاية في كل الحالات، رعاية المنشط و الزوج و الأب و الرّاجل بصفة عامّة

لمرا تقول إلّى بوها صرف عليها وإلّى هي تجبرت بش تخدم بش تخلّص لكرديات، المنشط سي علاء باقى موافق

ميساج امبليسيت6: لمرا ما تخدم إلّا ما تبدا مجبورة، لمرا ما تبدا بقدرها إلّا إذا يخدم عليها الرّاجل

تقول هي إنها ما عادش تحب راجلها على خاطر يضرب فيها بالسبتة، يهددها بالسلاح بش يحللها وجهها ولّا يعورها، هوني سي علاء يلح عليها بش تقول إلّى هي لازم مزّالت تحبّو حتى شوية، زعمة كان مرتو تهددو إلّى بش تقصلو كرزة بسكّينة الخبز يقعد في داخلو يحبها حتى شوية؟

ميساج امبليسيت7: الرّاجل قد ما يعمل لازم يتحب حتى شوية

المنشط يحب محمّد يتعهّد بش يولى يخدم على مرتو و بنتو و يوفرلهم كل شي،

عمرو ما جبد على خدمة لمرا و علاش هي قاعدة في الدّار

قالت إلّى تو فمّ كريز و ما فمّاش خدمة أمّا ما وقفش جملة على الكلمتين هاذم خارجين الموضوع و برّة

ميساج امبليسيت8: خدمة النسا اكسسوار، ما تخدم كان لمرا إلّى سعدها مكبوب

يحبّو زادة يتعهّد بش ما عادش يضرب مرتو، حتّى ضربا خفيفا لا، كينّى بالرسمى لحكاية أنو ما عادش بش يضربها

بش يقنعها يقلها: موش ساهل على راجل إنّو يعتذر!!

ميساج امبليسيت9: الرّاجل ديما عندو الحق، كان غلط ميسالش يصير على الرجال، أمّا كان اعتذر مالفوق ما عادش كلام وقتها

المنشط عمل كل شي بش يرجعها، نسى إلّى راجلها يهدد فيها بالسلاح

سي علاء يسمح لنفسو بش يقول إنتوما النسا ديما وعوعوع، معناها ديما موش راضين و تقنقنو

ميساج امبليسيت10: أصل المشكل في النسا، كان جاو مبلعين راهو هاذا الكل ما يصيريش

كل كلمة يزيد يقولها المنشط تزيد أعصابي تتوتّر

بش يقنعها يقلها: كيف الناس يراوك مع راجلك خير ملى يراوك وحدك

ميساج امبليسيت11: المطلقات الكل قحاب، راجل أعورلك عينك خير ملّى عندك زوز عينين و ما عندكش راجل

كبّش سي علاء، زاد كبّش، رجّعهم لبعضهم و هي ما عينهاش

الخلاصة: أنا كمواطنة تونسية نحب نشكي ب سي علاء لأنّو يستسهل العنف ضدّ المرأة، ويجاهر بالميزوجنيا متاعو في لسباس بوبليك إلى هو التلفزة الوطنية و يستغل جهل لعباد بش يقدّم حصّة تلفزية سنساسيونال و ما يهمّوش في العواقب، و كان لمرا هاذي يذبحها راجلها ـ ضربة الموس في عوض ما تجي في وجهها تنجّم تجي في رقبتها، شنوة بش يكون موقفو؟

بصراحة مزّلنا بعاد برشة بين التنظير متاع حقوق المرأة و القانون والواقع و خاصّة العقلية فم هفهوف غارق

ضحكة

2010-02-08T23:38:00.002-05:00

هذاي سكاتش بالسبنيور، يضحّك برشة، يحكي عل الواقع متاع هوني، هذاك علاش ضحّكني، ترجمتو الكل بالسوري، التمرين في حد ذاتو أنتريسون، تنجمو تحطّو الفيديو و تقراو بالسوري، نرمالمون تفهمو و تضحكو، حاولت في الترجمة نخلّى نفس ترتيب الكلمات،
في الثانية 36 يبدا السكاتش و تنجمو تبداو اتبعو
كان ضحّككم السكاتش راهو لقزرزيس نجح، ها تو نشوفو

...

Quelle est belle la neige!

Le journal intime de mon cousin argentin né à Santa Fé, qui vit à Toronto.

Le 12 août

Aujourd’hui, j’ai enfin déménagé dans ma nouvelle maison de Toronto. Quelle paix, ici ! Quelle belle campagne ! Je suis impatient de voir les collines couvertes de neige. C’est bon d’avoir laissé derrière moi la chaleur, l’humidité et les moustiques, ça c’est vraiment la vie.

Le 14 octobre

C’est la plus belle chose que je n’ai jamais vue, les couleurs des feuilles, me promener dans les bois. Aujourd’hui, j’ai vu un cerf, quel bel animal ! Il expose ses cornes comme une couronne, il est, sans doute, le roi de la forêt. Canada, c’est le paradis. Quand je me souviens que j’ai souffert tant d’années dans cet enfer qui est Santé Fé.

Le 2 décembre

Hier, il a neigé. Quel bonheur ! Je me suis réveillé, tout était couvert de neige, on dirait une carte postale. Je suis sorti pour pelleter la neige, j’étais tellement content que je suis tombé dedans. Après, on a joué à la guerre avec les boules de neige, avec les voisins. Qu’il fait bon vivre ici. La déneigeuse est passée pour nettoyer la rue, et j’ai dû pelleté de nouveau la neige. Je suis tellement heureux.

Le 22 décembre

Il a encore neigé hier soir, quand j’ai fini de pelleter, est passée de nouveau la déneigeuse et encore une fois elle a entassé, devant la maison, la neige sale. Je suis un peu fatigué de pelleter la neige. Aujourd’hui, j’ai appelé mon cousin à Santa Fé et il partait avec la famille à la station balnéaire de Guadalupe.

Le 25 décembre

Joyeux Noël. Ici, il n’arrête pas de tomber cette merde blanche. J’ai les mains pleines de gerçures à cause de la pelle, je pense que le cornu de la déneigeuse me surveille, dès que je finis, il passe de nouveau et remplit le tout de neige encore une fois, j’encule la déneigeuse et l’enculé qui la conduit.

Le 31 décembre

Le con des infos s’est encore trompé, au lieu des 30 cm annoncé, il y a eu 98 cm. Ici, on ne peut même pas fêter le nouvel an, personne ne peut sortir de la maison à cause de la putain de neige. Je suis fatigué et je me sens très seul, j’ai rappelé mon cousin et le salaud ne m’a pas répondu parce qu’il était à la Pileta, il est sûrement en train de griller un porcelet dans le patio, et moi, ici, sans pouvoir mettre le nez dehors.

Le 20 février

Aujourd’hui j’ai pu sortir pour aller au supermarché. En route, j’ai croisé un cerf de merde, j’ai essayé de l’éviter, j’ai pris un arbre, j’encule ce putain d’animal. Réparer la voiture va me coûter les yeux de la tête, je suis convaincu que Dieu a créé cet animal pour nous emmerder tous. Les chasseurs auraient dû les tuer tous.

Le 2 mars

Hier, j’ai glissé dans le verglas et je me suis cassé une jambe. Après, le fils de pute de la déneigeuse est passé de nouveau et j’ai de la neige jusqu’à dans le cul. Je veux vendre la maison pour m’en sortir de cette merde.

Le 23 avril

On m’a enlevé le plâtre. Le mécanicien a appelé et m’a dit que la réparation de la voiture va me coûter le double parce que le châssis est pourri à cause du sel qu’on utilise pour faire fondre cette neige merdique. J’encule, la voiture, la neige, le mécanicien et toute la population de Toronto.

Le 15 mai

Aujopurd’hui, enfin, j’ai vendu la maison à un canadien cornu. La vérité : qui pense venir vivre dans cette merde froide et solitaire. Demain, je rentre à Santa Fé, j’ai hâte d’y être pour pouvoir profiter de l’humidité, la chaleur et les moustiques. Dès que j’arrive je vais manger un rôti à Sauce Viejo et après logiquement au bar avec mon cousin. Ça c’est vraiment la vie !

coup de coeur poétique

2010-01-30T19:56:00.000-05:00

إكتشفت اليوم شاعر و فنّان تونسي إسمو مهدي هميلي، بصراحة عجبني برشة، كو دكور بالحق

قالولى إلّو هو معروف نسبيا، معناها ديما نخلط امّخر، مابركها ما جيتش جورنلست ولّا راهو حتى حد ما يخدمنى، نقترح عليكم قصيدة مونولوج ملعون، موجودة في البلوق

متاعو و قصيدة ليلى في بلاد الكاروسال مصورة

هاذي حلوّة ياسر

ما عرفتش نحطها في البوست، أهوك نزلو عليها تجي على فاسبوك

مونولوج ملعون
"......

لْسانِكْ أطوَلْ ماللاَّزِمْ
و جُرْحِكْ أعْمَقْ مٍالمَحْدُودْ

قُصْ جْوانحكْ
و ألْعَنْ بُو الجْدُودْ
خَلّي دَمْعك ينزِل
و يزِفْ عالخْدودْ
يشُق فيهم الجِلْدْ
و يكسِّرْ العْظَمْ
...

يا مِيمْ
ياللّي في أهل الذِّمَّه
تْذِمْ
تْذكّرْ لُورْكا
و عرْسو اللي ْبالدَّمْ
..

يا مِيمْ
راكْْْ بلا تَصَْريحْ
باشْ تْحِلْ هالفُمْ
و تبْعِث الكلام في الرّيحْ
و تَرجَّعْ الأحْمِرْ..للعَلَمْ
..
يا ميم
راو..مِنِّكْ الصُّوتْ بَحْ
فِينْ هازينِكْ حْرُوفِك
انْسى الأبراج العاليه
أعلى ماتُوصِّلُو إنْتي سْطَحْ
على خِرْبه خَايْخَه
في شارعْْ مَنْسي
وراء مْدينه شايْخَه
..

يا ميم

كي يجِدْ الَجَدْ
و يصُحْ الصَّحْ
و يسْكُْنْ المدينه
ناس البْلحْ

يكون وقتها
صوتك بح
و الحب من قلبك..تِمْسَحْ
وقتها يا ميم..
يكَفْروكْ..بِإِسْمْ العَليمْ
و يرَكْبُوكْ بْهيمْ
و في الصحراء
يسَيْبُوكْ
تلْمْلِمْ آخِرْ كعْبه بْلَحْ
..
..
يا ميمْ
أنسى الخُلودْ
و صَفَّقْ
و أبقى حَجرَه هازْها وادْ
و صَفَّقْ
مَضْمِضِ
مالعِبادْ
و صَفَّقْ
إدْفِنْ إحساسك
و صَفَّقْ
..
و تْذَكِّرْ إلّي إنتِ
لا دين و لا مِلَّه
على قلْب هالبلادْ
راكْ عِلَّه
...

إنتْ ميم
إنتِ حرْفْ
موشْ موجود
لا في الفناء
ولا في الخُلودْ
إنتِ حَرْفْ
ممدودْ
في قْبَرْ
مفقود
مابين الحِلْمْ و الوُجودْ
...
...

ميمْ
ملعونْ
ميم
مجنون
ميم
مهزوم
ميم
مسْكُُون بالنَّاسْ
ميم
عَبْد ْمِنْ إحْساسْ
ميم
مسفوك كْلامِكْ
ميم
منطوق بيك في السْكاتْ
ميم
ما يْطيلِكْ المَماتْ
ميم
فاَني
ميمَ
حَيْ
ميم
ظْلامْ
ميمْ
ضَيْ

...

كيما تْفَبْرِكْ حْروف
و تْصاوِرْ
أخْلَقْ منِّكْ حَرْف جْديدْ
و بْلادْ جديده
بِضْمايِرْ
..
و أنْفُخْ على صوابْعك
يَطفى الشْمَعْ
..
الشْمَعْ يا ميم
ذابْ
والقَلبْ راو عابْ
الوجه سْوادْ
و الشّعَرْ شابْ
الصُورَه..وَلاَّتْ عُورَه
و الكِلْمَه..
وَلاّتْ حلاَسْ
يِلْبِسها العاري
و يَنْزَعها الّلاَّبِسْ
يْمقُتها الفارِس
و يُكْنِسها الكانسْ
..
..

تُوبْ يا مَلْعونْ
تُوبْ يا ميمْ
و طَبِّق قانون الحروفُ
الميمْ
موشْ زْميمْ
عالسْما و الغِيمْ
..
..

شكونكِ باش تتمَرّدْ
عالأليف و اللاَّمْ
و تْكَسِّرْ القَواعِدْ
في اللُغه و الأفلامْ
..
..
تْفَكِّر اللِّي كيفكْ
كيفاش
تحت حيوطْ النسيان
شابُو
..
عُمْرِكْ ما كُنتْ جْبَلْ
راكْ مُجَرّدْ طابُو
لِشْقَفْ دَبُّوزَه
راكْ مْفَتْفِتْ كي اللُّوزَه
على طاوِلْةْ سَكْرَهْ
..
يجيكْ نْهار
و تْموت الفِكْره
و تُوفى البَلْعَه
و تِفْهِمْ
إلّي إسْمو الوطَنْ

مْشى..مِنْ غِيرْ رَجْعَهْ
....
"..

M مهدي هميلي
باريس
أبريل 2009
إلى... ألان غينزبرغ
Dedicated to... Allen Ginsberg

La beauté : la perte

2010-01-30T03:13:00.003-05:00

Qu'est ce qui fait que la beauté soit perte ? Perte de soi, perte de morale, perte de valeurs, perte du bon sens, de la raison. Qu'est ce qui fait que la beauté soit soumise à l'interdit, qu'on ne puisse apprécier le beau que dans des cadres rigides légitimes ? Qu'est ce qui fait que la beauté n'est belle qu'aux yeux de tous, tributaire du consensus, obéissante, docile ? Pourquoi avons-nous peur du beau, pourquoi le refuser, pourquoi nous ne nous laissons pas perdre dans la perte...

Que nous sommes confortables dans notre prison !

المحميّات شكون تحمي؟ البرّاني ولّا مولى الدّار؟

2010-01-27T23:35:00.005-05:00

كيما ما وعدت فررر في التعليق متاع البوست إلّى فات، بش نحكيلكم شوية على السكان الأصليين متاع الكندا، ملّى نعرفو أنا و ملّى يحكيوه لقباقبة موش من منظور تاريخي ولّا سياسي ـ الجزء هذا بش يحكي عليه علولو في المدونة متاعو، حكيت معاه و اقنعتو بش يكتبلنا حويجة تاريخية صحيحة لأنو عندو معلومات واضحة على الموضوع، وفي إطار زادة إنّو الرجال قوّامون على النساء بما إنّو عقلنا أضعف و ما يشد شيء أهوك من غير ما ندخل في ميادين رجالية بحتة كيما العلم و الثقافة و نحشّم روحي، و هو يعطيه الصحة بش ينقذ الموقف
ـ و خطى التفدليك خدم على بعض النصوص و قرّاها ويعرف فاش قعّد يقول ـ

أمّا قبل ما نبدا حبّيت جوست نقول لفررر إلّى راهو ما نقولوش قبقوبيين: لذّكرنقولو قبقوبي، وللأنثى قبقوبية، ومقبولة زادة قبقوبة، في الجمع لقباقبة أو القبقوب -هاذي كيما التربيجة
و ينجّم يكون أدجكتيف و تولّى الشعب القبقوبي أو الأمة القبقوبية، ثم زادة مشتقّات, مثلا نعوت إلّى خرجو على جلدتهم و:

قبْقْبُو، ومنهم لمْقبْقب و لمْقبْقبة و الفعل يولّى قبْقب يُقبْقب

فم زادة حالات أخرى كيما مثلا واحد يبدى يتبهنس نقولو يِتْقبْقب و إلّا ريت فلانة وعيات وهي تِتْقبقب عليّ أما هاذي حالات شاذة لا يقاس عليها

و لعباد هاذم نحاولو بش ما نخالطوهمش برشة

المهم تو إلّى الشعب القبقوبي طيب في غالب الأحيان
(كيما ما حكيتلكم على لفلوس إلّى عطاوها إل هايتي)
معناها زادة إلّى لعباد قلوبها صافية و ما تكمبصش برشة كيما في بلدان
أخرى، أمّا فمّ حاجات تنرفزهم و تخرّجهم من صينتهم، مثلا ما يحبّوش البطّالة و جماعة
BS : Bien être social, منحة الفقر و إلّى ما عندهمش دخل

حسب رايهم بخليّين و ما ثمّاش علاش هوما يخدمو على عباد ما تحبش تخدم، يكرهوهم أكثر مالعرب و الأفارقة و الهنود و الشنوة و خلق ربّى إلّى موجودين هونى أشكال و ألوان بأتم معنى الكلمة

أكثر عباد تعاني مالبطالة وعايشة على البس هوما السكان الأصليين، 3 مرّات أكثر من الكنديين لخرين،
%النسبة توصل عندهم إل 29
هوني ما يقولوش عليهم زنديانات كيما ما نقولو أحنا قلّك الكلمة هاذي خايبة و فيها عنصرية، ما عادش يقولو زادة أسكيمو، كيف كيف كلمة عنصرية، عاد بش نقاومو العنصرية ثم مصطلحات بوليتكمون كوركت ننجمو نستعملوها مثلا السكان الأصليين(autochtone)،
وإلّا أمرنديان
(amérindien) جاية من أمريكي وهندي
و إلّا زادة الأمم الأولى (premières nations)
فلحو كان في اللغة و ال بوليتكمون كوركت أمّا الرسمى ما ثماش ـ

بش نرجعو لعلالشنا و إلّا لدبوبتنا ـ إحتراما للموقع الجغرافي إلّى نحكيو عليه ـ السكان الأصليين يعانيو مالبطالة، مالفقر ـ أغلبيتهم فقراء حسب المصدر ـ ينتحرو برشة، ما يعيشوش ياسر، المخدرات والكحول ضاربين عندهم ويزيد البارح و أنا مروحة وقّفنى واحد متطوّع (موش كيما متاع السعودية) يلم في الفلوس للمرضى بالسيدا، قلّى إلّى 12% من المرضى في كيبيك زنديانات، ظهرلي برشة خاصة إلّى هوما شوية بالكل 4,4% و يزيد مرضى وفقراء و ألكولو، الحاصل عايشين في الهم و الهم يسالهم، و يزيد لقباقبة يكرهوهم كره عنيف
على خاطر يظهرلهم إلّى لا يزّى عايشين عالة عليهم، لا يزّى لعباد الكل تتعاطف معاهم، ما هومش فاهمين علاش، و يزيد إلّى يحط ساقو في الكندا يحب يشوفهم و يكتشف حضارتهم و الكندا كبلاد و شعب متحضر ما تعنيلو حتى شي ـ هاذي قالوهالى هكّة بالحرف الواحد ـ

يظهرلي وحسب ما فهمت إلّى المشكلة موجودة في السيستام متاع الريزرف
(réserve)
يعني المحمية، المحميات هاذي موجودة في الكندا الكل و في أمريكيا زادة ـ كان ناقفو على المصطلح نلاحظو إلّى كلمة ريزرف تُستعمل للحيوانات إلّى خايفين عليها ل تنقرض، خممت زعمة شبهوالسكان الأصليين بالحيوانات ولّا العكس، أول ريزرف تعملت في الكندا عام 1637 معناها تبعو عليها بش يحميو الحيوانات، في آخر الأمر موش مهم شكون لوّل على خاطر وجه الشبه موجود ـ

الزمرنديانات إلّى يعيشو في المحميات ما يخلصوش آداأت و عندهم الحق يصطادو على طول العام موش كيما الكنديين إلّى لازمهم رخص و عندهم أوقات محددة، إلّى يقررو بش يخرجو و يندمجو مع الكنديين ـ و ما يموتوش بالألكول وإلّا بالدروق و
إلا بالسيدا ـ يفقدو الحقوق هاذي
و يولّيو يخلصو أدءآت ويعيشو كما لعباد العاديين، هي طريقة غير محبذة على خاطر يخافو عليهم لا يضرهم الإختلاط و يفقدو هويتهم

لذلك أغلبيتهم يقعدو في ل ريزاف
يصطادو شوية، يسكرو برشة و يموتو فيسع

المحميات معمولة بش زعمة هوما ما يفقدوش لغتهم و هويتهم أمّا إلّى صاير هو إلّى إنهم فقدو إنسانيتهم

ممكن البوست ما يفسّرش مليح الوضعية، أمّا تو نحاول نجاوب بلّى نعرف في التعاليق و بوست علولو هاو خالط

Le Canada a-t-il trahi les autochtones?

Les autochtones et les lois

ما تصح الصدقة إلّى ما تززّى إمّالى الدار؟

2010-01-15T12:28:00.000-05:00

عندي 9 سنين نسكن في الكيبيك، هالمدّة بطّالة، نفركس في خدمة أمّا ما لقيتيش، شوية كريز على شوية راسيزم، ليّ 6 شهور قاعدة

فى السنين إلّى فاتت الكل عمري ماحسّيت روحي قريبة لل قباقبة، باردين كطقسهم، أندفدويلست، يصيرش زلزال، كل فول لاهي في نوّارو، تعيش هوني وحدك، كل شي مبني على الإنتاجية، أنا أنتج إذا أنا موجود، ليّ 6 أشهر ما ننتجش، معناها موش موجودة في المجتمع هذا

اليومة الصباح ـ أنا راقدة الحق، ماو تعرفو أوّل سامبتوم متاع لبطالة هو النوم ـ ضرب التلفون، جاتني خدمة استعجالية، قلت خلّى ننتج شوية و نحس بوجودي هالأيّمات

الخدمة متاع جمعة هكّاكة، بش نجاوب على تلفونات لعباد إلّى تحب تعطي فلوس إل هايتى، ضميري عذّبني، قلت بش نسترزق من مصايب لعباد،أكبر حتى من مصيبة، مأساة، موتى، حيين كيف الموتى، جوع، مرض، لبلاد الكل بركت، شي فعلا يحزّن القلب و المخ، قلت ممكن إلّى بش نخدمو ينفعهم حتّى شوية

هزّيت روحي، خذيت المترو ـ كيما الخدّامة الكل، ماحلاه الوجود ـ وصلت لسّنتر، أنا دخلت نلقى صالة كبيييرة، فيها أقل حاجة 30 بشر كل واحد شادد بوست، عطاوني بلاصة، كاسك و اوردينتورـ ذبت في البيزاج ـ أنا حطّيت الكاسك و التلفون بدا يضرب، 7 سوايع النفس لا، نحكيلكم على أربعة ما نسيتهومش

ـ مرا و راجل كبار في لعمر، ممكن يقراو شوية وبرة على خاطر شيحولي ريقي و أنا نفهّم فيهم وين يلقاو نمرو الكارطة و تاريخ نهايتها، بعد ما نجمو يعطيوني المعلومات الصحيحة وهوما واحد يعدّى في التلفون للّاخر سهلتهم قدّاش بش يعطيو، قالو 350$ (دخت ـ لي 6 شهور بطّالة راهو، وهوما أكيد متقاعدين و تتسمّى تفتوفة باهية بالنسبة ليهم)

ـ مرا عطات 365$، تعجّبت مالدقة متاع لعدد، سهلتها، كل عام، وكل نهار في هاكالعام تحط دولار على جنب، آخر العام تعطيه لجمعية خيرية، أمّا الزلزال ضرب أوّل العام، ما عندهاش فلوس، زادت في المارج متاع لكريدي ـ معناها تسلفت فلوس بل لنتريس ـ وبش تلمهم بالدولار بالدولار على طول العام

ـ راجل عطى 200$، عدّالى مرتو عطات 200$، عدّاتلي بنتهم عطات 50$، زادت عدّاتلى خوها عطا خمسين دولار

ـ مرا طردوها مل خدمة، راجلها لحق عليها، مكتئبين الزوز، كيف راو إلى صار في هايتي حمدو ربّى على الصحة و عطاو 300

ـ مرا تكلّم فيّ و تتفرّج في التلفزة و تبكى بالشهقة: 500

أقل حاجة عملت 30 ألف دولار، السنتر محلول24/24

حلّوه بش يعاونو المراكز لخرين متاع الهلال الأحمر على خاطرهم عملو بوق جنرال، وقفو الكل من جرة الكمية المهولة متاع التلفونات
حاجة أخرى: لعباد تسهل شنوة بش يعملو بالفلوس، وقتاش بش يوصلو إل غادى، مهتمّين معناها موش تطيير ملام و برّة

ما نيش نحكي على عباد إلّى عطاو ألف و ألفين و 3 لاف دولار، هاذوكم لاباس عليهم، ينجمو يعطيو، إلّى بهّتنى هوما لعباد المتواضعة إلى نحّات من روحها بش تعطى لّلى فقدو حتى الإحساس بإنسانيتهم، هام طلعو موش باردين و موش أنانيين و يحسو بغيرهم، هاي الفكرة إلّى تصنعت عندي لمدة 9 سنين تبدلت كلّيا، حسّيت بالسعادة إنّى نعيش في المجتمع هذا مع لعباد هاذم إلّى قيمة الإنسان عندهم أهم قيمة

لحكاية هاذي مسّيتنى و خلّاتنى نخمم، علاش لعباد هاذم يساندو المنكوبيين فى هايتى أمّا ما يساندوش البطّالة فى بلادهم، علاش ينحّيو من رواحهم و يعطيو على أساس التصاور متاع التلفزة و كيف تطيح قدّامهم في الشارع حتى حد ما يغزرلك، علاش أكره ما يكرهو هوما السكان الأصليين متاع أمريكيا (الهنود الحمر) ويخلّيوهم يغرقو فى للكول و المخدرات ؟؟؟

علاش ما تعيش معاهم إلّا ما تكون منتج و عنصر فاعل اقتصاديّا و ما يهزّوكش كان طاحت بيك، كيفاش ننجمو نفسرو الفنومان هذا؟

الجنة المفقودة

2010-01-07T16:51:00.002-05:00

زوز حاجات خلّاونى نخمّم في البوست هذا، تدوينة آرتكولي

على التنصير و التبشير و روبرتاج عملوه البارح في اخبار

فرانس 2

التدوينة متاع آرتكولي تنجمو تقراوها، تحكي على بعض

التوانسة إلّى بدلو الدين الإسلامي بالدين المسيحي و بالطبيعة

مقتنعين باختيارهم و يكتبو في الشعر زادة، و روبرتاج

فرانس2 يحكي على ليهود لفرنسيس إلّى يقررو بش يهاجروإل

إسرائيل، وجه الشبه إلّى ريتو موش ديني (فمّ فرق بين واحد يبدّل دينو ـ معناها يلغي طرف من هويتو و من نفسو ـ وواحد يحب يزيد يمارس دينو وو يغرق في هوية ما اختارهاش في الأصل)
وجه الشبه بيناتهم ـ حسب رايى ـ هوالبحث عن الجنة المفقودة في إطار جماعي : كيفاش الإنسان ضايع وحدو، يحب ينتمي إل حاجة مهما كانت الصعوبات
إلّى يبدّل دينو ماهوش مرتاح في ثقافتو و مع لعباد إلّى حولو، حسب رايو الكلهم غالطين و هو أخيرا لقى الثنية الصحيحة مع مجموعة أخرى، نتصوّر إنّو أخيرا يحس بالرّاحة لأنّو غيّر إلّى كان مقلقو واطمئن على مستقبلو فى الآخرة، مادام اقتنع بأنّو يتبّع في الديانة الصحيحة، لازم بش يوف في الجنة هو والمجموعة الجديدة إلّى اختارها، بش يتعب، يتكره، يقص جملة وحدة مع عائلتو، صحابو، المجتمع متاعو، موش مهم مادام لقى ثنية الجنة المفقودة
لفرنسيس يهود إلّى يقرّرو بش يهاجرو إل إسرائيل في نفس لبروسسوس، يفركسو، يبحثو و يلقاو إلّى ما ليهم إلّى دينهم و ما تلمهم كان "بلادهم"، المجتمع إلّى تبنى على قاعدة دينية لا غير، ينساو حاجات أخرى من هويّتهم ـ إلّى هما فرنسيس مثلا ـ و يتوجهو للجنّة المفقودة، مالمطار ياخذو جنسية إسرائيلية، يتعلمو لغة جديدة ـ بلاش ـ العبري، و يزيدو يعطيوهم ديار فيها بيبان بلاندي ـ على ما ياتي: حرب، قنابل، انفجرات ـ عباد تضحّى بأهم حاجة: الأمن و الإستقرار بش تضمن طريق الجنة ليهم وللّى معاهم
حاجتين ظهرولي مهمّين:
ـ البحث عن الرّاحة في العالم الآخر و هذا لازمو تضحيات كبار في العالم هذا ـ موش جديد بالطبيعة، المهم إلّى التضحيات كبرت و ولّات تاخذ حجم مهول في الحالات هاذي،

الطقوس إلّى تعملها بش تدخل للجنّة حتى شي قدّام قرارات كيما هكّة
ـ الإنتماء لمجموعة لقات الحقيقة و الدخول للجنة موش فردي و إنما جماعي،(رغم إلّى في أغلب الديانات الدخول للجنة فردي موش جماعي)، ممكن العالم إلّى عايشين فيه تو، إلّى مسح روح الفاميليا والجيران و الأصدقاء في أقل من قرن، خلّى لعباد تفركس على إنتماآت جديدة تعوّض بيها الحرمان العاطفي

والإجتماعي و تخلّى إلّى حتى مالجنة ما عندهاش طعم كيبدا

الإنسان وحدو

قرارات 2010

2009-12-30T23:02:00.000-05:00

السنا عندي قرارات للعام الداخل، كل عام ناخذ نفس القرارات

أمّا كل عام يتعدّى و ما يتبدّل شي، كان لوجوه، تمشي وتجي

أمّا أل رفلاكس هو نفسو، قارين فرد مكتب، كان يجيو يقراو

علينا تو تتنحّى فكرة لكلوناج، فمّ 10 ملايين كلون في تونس

( clone ولّا clown كيما ما تحبّو)

عاد قلت في عوض ما ناخذ قرارات مستحيلة لأنها ما تتوقّف

كان عليّ، السنا باش نكون واقعية و نبدا اننفّذ في قراراتي من

النهار لوّل

الواحد بش يحقّق السعادة المنشودة لازمو ينحّى الحاجات السلبية

الكل من حياتو، قرّرت أوّلا بش نبدا بالباز، مفهوم السعادة في

حد نفسو، شكون مل لعباد إلّى نعرفهم سعداء و إلّا يظهرو

سعداء (المظهر مهم جدّا)، تفرّجت شوية و قرّرت بش نتعلّم

منهم

المظهر : لازم تظهر سعيد، موش مهم من داخل، ورّى للعباد

إلّى كل شي لاباس، خدمة ماشية، صحاب سمباتيك، فاميليا

سعيدة... إذا كان هوما اقتنعو أهوك ربحت شويّة ساعات سعادة

في النهار، تكذب على روحك؟ موش مشكلة، هي روحك في

آخر الأمر، تكذب عليهم؟ موش مشكلة ماك إلّا كذّاب في وسط

المجموعة الكاذبة: الشنقة مع الجماعة خلاعة

لصحاب: لازم نبدّل نوع لعباد إلّى نخالطهم، الصحاب إلّى

تستدعاهم و يشومولك الليلةبالدين و المرأة و أوديب و فرويد

و الفلوكراسي:) و الأمورالاقتصادية و السياسية و البترول و

علاقتو بإسرائيل و فلسطين و مشاكل الشرق الأوسط و إيران،

باهين هوما ما قلنا شي، أمّا يخممو برشة، كان تعمل اصحاب

تحب الكورة مثلا لازم بش يجي واحد منهم شايخ على خاطر

جمعيتو ربحت، لبنات إلّى تحب الماكياج مثلا لازم بش تجي

واحدة فرحانة على خاطر شرات حمّير جديد و حتّى وحدة ما

عندها منّو، فمّ إلّى تجي مفرهدة على خاطر عملت ريجيم و

ضعافت و لابسة روبا حتّى وحدة ملّى قاعدين تنجّم تدخل فيها،

بلقليلة عندك زوز ولّا ثلاثة فى السهرية سعداء نهارتها و تنجّم

تعمللهم كونكورونس في درجة السعادة متاعك

لكتب: من أهم الحاجات السلبية ، ما عادش نشد كتاب في يدى

وفمّ كتّاب لازم يولّيو ممنوعين جملة وحدة، كيما كافكا مثلا،

يحكى على واحد رقد قام صبح حشرة، كافار حاشاكم، لعباد ما

حاجتهاش بالمظهر بش يكونو حشرات،ولّا خوسي سراماقو، هذا

يحكي على واحد عما ـ اللطف ـ و عدا لعباد الكل و كلهم ولّاو

عميان، ت هانا الكل نشوفو في الواقع و نطبقو فيه وروحي

روحي لا ترحم من مات، كتب كيما نهكّة بشنحطهم في الزبلة

حتّى بش نعطيهم ما يتعطاوش، رغم إلّى ممكن يكون مشروع 2010

كوني نساهم في تعاسة لعباد ـ من غير حتّى ضمير ـ بش

تنقص عليّ الكنكورونس

في بلاصة لكتب فمّ الجرائد و المجلّات، مثلا صفحة الوفايات

في لابراس، ننجّم نقراها كل يوم، يسخفوني إلّى ماتو و نفرح

إلّى بلقليلة حيّة و ننجم نشوف شكون مات، المجلّات النسوية

فيهم اختبارات السعادة، ننجم نعملهم و نطلع سعيدة، ننجم زادة

ما نقراش جملة، لواه المرج

السينما: في 2010 بش نولّى نتفرّج كان على الأفلام إلّى

يضحكو كيما شوشو مثلا متاع قاد المالح، آخر فيلم تفرّجت

علىه يحطم، هو من إسمو ظاهر (أنتيكريست)، تفرّجت على

أفلام لارس فون تريرر الكل، لواه، شنوة زادوني؟ حزن على

حزن، سبسيالست في المصائب و النفسيّات لمريضة، في

الإنسان و الميزيريا متاعو، ش همني فيهم أنا، أعطيني فيلم

يضحّك، يفرهد، و مخّك واقف لمدّة ساعة و نصف ولاّ ساعتين

قد ما مخّك يوقف عن التفكير قد ما تحس روحك خير، أسعد

المسرح: هو في الأصل زايد أمّا السنا فلّتت سعدون، لازم

نتفرّج عليها العام الجاي

التلفزة: أحسن حاجة المسلسلات المصرية، ما عادش بش نفلّت

حتّى واحد، منها نتفرهد و منها نلقى شنوة نحكى مع صاحباتي

الجدد ـ مع المعذرة لصحابي لقدم إلّى بش نبدا نطفّى فيهم

بشوية بشوية ـ

أنترنات: بش انحّى الكونت تويتر إلّى عندي خاطر فيه عباد

تحط برشة اخبار و يزيد يعطيو رايهم، يتعبو بصراحة لا نهار

يحطّو حاجة تضحّك، كان لمصايب و التعاسة و يزيد ما ثمّاش

تجغجيغ كلمتين و قص، بش نرجع ننشط على فايسبوك، لعباد

الكل تحكى في قصة حياتها و يزيد بالتصاور، و سعّات تلحم

عركة و سبّان، أهوك أنيماسيون، أمّا بش ننحّى الجماعة إلّى

تحط في روبرتاجات و كريكاتورات و مقالات، زايد، يوجعولك

قلبك و أكهو، ممكن نرجّعهم في آخرالعام وقتلّى نفقد الإحساس

بالآخرين و نجّمت نوظّفهم إل سعادتي فقط

أخيرا: نتمنّالكم عام مبروك، كلّو سعادة ـ رغم إلّى في قراراتي

الجديدة ما نتمنّى الحاجة الباهية كان لروحي ـ أمّا مازلنا في

عمناول و ديما عمناول أبرك مالسنا

Fragile

2009-12-30T20:31:00.000-05:00

"Désir ivre"

2009-12-29T12:52:00.011-05:00

ARTS INVISIBLES

« Toi qui chantes toutes mes morts,
Toi qui chantes ce que tu ne livres pas
au sommeil du temps,
décris-moi la maison vide,
parle-moi de ces morts habillés de cercueils
qui habitent mon innocence.

Avec toutes mes morts
je me remets à ma mort,
avec des poignées d’enfance,
avec des désirs ivres
qui n’ont pas marché sous le soleil,
et il n’y a pas une parole matinale
qui donne raison à la mort,
et pas un dieu où mourir sans grimaces. »

Alejandra Pizarnik, Les Aventures perdues [Las aventuras perdidas, 1958], Œuvre poétique, Collection Le cabinet de lecture (dirigée par Alberto Manguel), Actes Sud, 2005, p. 48.

Paru dans le blog Terres de femmes

الحب، وهم الحب و الظروف

2009-12-21T15:49:00.005-05:00

سعّات في الدنيا هاذي يعرضونا عباد، في أكثر الأوقات بمحض

الصدفة و أغلبية الأحيان موش في الوقت المناسب على خاطر

الوقت عمرو ما يناسب ـ فمّ شكون يقول إلّى الوقت موش

موجود أمّا هاذي حكاية أخرى ـ نتعلّقو بيهم، و نسمّيو العلاقة

هاذي حب

المجتمع يقول و أحنا فهمنا و وافقنا إلّى باش العلاقة هاذي

تكون ناجحة لازم تنتهي بعرس: زازة، فرقة من الدرجة الثانية

و برشة عباد إنت مصدّر و هوما يغزرولك و يقطعو

فيك و يريشو و هذيكة قمّة السعادة للعرايس

إذا كان العلاقة تفشل ما تنتهيش بعرس، تنتهى فقط و صعيب

بش يجي واحد ولّا وحدة

و يقلّك ما عرّسناش خاطر ما نتفاهموش ولّا ما عادش نحبّو

بعضنا ـ هذوما يجيو بعد العرس موش قبلو ـ تتقص العلاقات

الجميلة ـ يظهرلي ما ثمّاش أجمل من زوز يحبّو بعضهم ـ على

خاطر الظروف موش مواتية، على خاطر لعباد الكل تتدخّلك

في حياتك بش تعطي رايها و تنصحك ـ بلاش نصيحتهم ما

تنجّمش تعيش ـ فك عليك منّو/ منها موش متاعك: أكبر منّك،

أصغر منّك، بطّال، ما عندوش مستقبل، أفقر منّك، بش تقعد

تقاسي فيه، إلخ إلخ

المجتمع يحب العلاقات المتكافئة: عمر، قراية، فلوس،جنسية،

إذا كان هاذا صحيح علاش لعباد إلّى موش متكافئة تنجم تحب

بعضها؟ و علاش إذاكان حبّو بعضهم ما

ينجموش يتغلبو على الظروف؟ أحنا إلّى نحكمو في الظروف و

لّا الظروف هي إلّى تحكم فينا؟

ديما تلقى واحد مل ثنين إلّى يحبّو بعضهم يخضع لظّروف، و

قد ما لاخر يدزّو شي

الظروف غلبتو أو بالأحرى لخرين غلبوه و يسلّم: أمّا عدم

تكافؤ في الحب: واحد يحب أكثر ملّاخر هذاك علاش ما

يسلّمش و إلّا فمّ شخصية ضعيفة ما تنجّمش تواجه المجتمع

الخارجي

محاولاتنا بش نكونو دائما داخل المجتمع هي إلّى تخلّينا نحطمو

علاقات مهمّة نضحّيو بسعادتنا مع إنسان بش نكونو مطابقين

لصّورة إلّى لخرين عندهم علينا و نخلّيو عباد أخرين و ظروف

أخرين تحكم فينا مع شكون و وقتاش ننجمو نكونو

سعداء، مفهوم السعادة يفقد الصبغة الشخصية و يولّى اجتماعي

لكن نعرفو من جهة أخرى إلّى هذا موش صحيح: لعباد إلّى

تختار علاقة حب ناجحة إجتماعيّا موش بشرطه بش تتحقق

السعادة الفردية، قدّاش من دار نندخلولها و نفهمو

إلّى الكل مخصص للمظهر و إلّى الراجل و لمرا ما يحبّوش

بعضهم و الأسرة إلّى ناجحة اجتماعيّا فاشلة عاطفيّا

علاقات الحب الفاشلة تؤثر برشة في نفسية الإنسان خاصة إذا

لقى روحو خاضع إل ظروف موش ظروفو و ما ختراش بش

يخضعلها، على خاطر الشك يدخل بين الطرفين: إلى أي حد

هي الظروف إلّى حكمت و موش قلّة حب، إلى أي حد تحب

الإنسان في حد ذاتو و إلّا ما يمثلو إجتماعيّا،إلى أي حد تنجّم

تحبو أكثر من روحك

إذا كان تسلّم فيه على خاطر "الظروف" هل أنت تغلّبت على

أنانيتك؟ و أخيرا إلى أي حد كان حب ولّا وهم حب

Hannibal, la musique

2009-12-12T03:00:00.002-05:00

La métamorphose

2009-12-11T12:49:00.004-05:00

Lorsque Gregor Samsa s'éveilla un matin au sortir de rêves agités, il se retrouva dans son lit changé en un énorme cancrelat. Il était couché sur son dos, dur comme une carapace et, lorsqu'il levait un peu la tête, il découvrait un ventre brun, bombé, partagé par des indurations en forme d'arc, sur lequel la couverture avait de la peine à tenir et semblait à tout moment près de glisser. Ses nombreuses pattes pitoyablement minces quand on les comparait à l'ensemble de sa taille, papillotaient maladroitement devant ses yeux.  

"Que m'est-il arrivé ?", pensa-t-il. Ce n'était pas un rêve. ...

Franz Kafka, La Métamorphose et autres récits, Gallimard, 1990, p. 79. 

Source de l'image.

بصيص أمل

2009-12-10T19:01:00.004-05:00

الفيمينيسم و تناقضاتي

2009-12-02T19:17:00.000-05:00

بما أنّى نهتم بموضوع المرأة في المجتمع، و بما أنّى مرا و عندي موقف من الموضوع هذا، ديما تصيرلي كونو أصحابي يتساألو
، كيفاش إنت مرا و عندك الموقف هذا و تحكي عليه و مقتنعة بيه و تعمل هكّة وإلّا تقول هكّة و إلّا ما تفهمش الوضعية هاذي، إلخ، شبيك عندك تناقضات و إلّا ما تتحمّلش مسؤولية مواقفك

أوّلا لكلنا معرضين للتناقض: بالضبط كيما باراك أوباما :)

ثانيا بش نفهم روحي و نفهمو بعضنا قررت نعمل دورة صغيرة على بعض الدراسات إلى خرجت على الفمينيزم و نحدد موقفي و تناقضتى على أساسها

لقيت ارتيكل علمي يحكى على تاريخ الفمينيزم و أهم التيارات:

« Typologie des tendances théoriques du féminisme contemporain »

Guy Bouchard

Philosophiques, vol. 18, n° 1, 1991, pp. 119-167.

الكاتب راجل ـ أمّا هذا ما يعني حتي شي بطبيعة الحال ـ أستاذ متاع فلسفة في جامعة لافال في كبيك، و لرتيكل هبط في مجلة علمية محترمة جدّا، معناها التلخيص إلى بش نعملو عندو أساس علمي ـ موش معناها كلّو صحيح أمّا بلقليلة موثّق ـ

هاو التلخيص كما يقترحو الكاتب::

L’étude des rapports entre féminisme et philosophie politique présuppose une classification des principales tendances théoriques du féminisme contemporain. Nous présentons d’abord la typologie proposée par Alison Jaggar et nous indiquons les problèmes qu'elle pose. Nous examinons ensuite un ensemble de textes consacrés, expressément ou non, à la taxonomie de ces tendances, pour dégager une grille permettant de les rassembler dans un même cadre théorique explicitant les enjeux qu'elles thématisent, mais aussi ceux qui sont ignorés.

أكثر حاجة تهمني في لرتيكل هذا هو السرد التاريخي للتيارات الفمينيست في القرن العشرين،ما نيش بش نتعرّض لتحليل الكاتب لأنّو عندو اهتماماتو الخاصّة

هاو شنوة استخلصت أنامالجزء الأوّل متاع الدّراسة هاذي

الإعتراف بأنّ حقوق المرأة مهضومة و إنّها لا تتمتع بنفس الحرية إلّى يتمتّع بيها الرّاجل هي القاسم المشترك بين جميع التيارات الفمينيست، المبدأ هو نفسو أمّا تحليل الظروف ـ مثلا ـ إلّى وصلتنا لنّتيجة هاذي اليوم و تحديد المطالبة بالحقوق: أناهى حقوق، الأولويّات و كيفية المطالبة بيهم يتغيّر حسب الزمان والمكان

الكاتب، إلّى هو زادة يرتكز على دراسات أخرى يذكر منها بالأساس كتابات أليسون جاقر، يحدد خمسة تيارات الأكثر أهمية

نذكرهم رغم إلّى هوفي الجزء الثاني يناقش التصنيف هذا إلّى قامت بيه جاقار عام 77

- Le féminisme libéral

- Le féminisme marxiste

- Le féminisme radical

- Le séparatisme lesbien

- Le féminisme socialiste

الفمينيسم اليبرالي يركّز بصفة خاصّة على المساواة بين الرجال و النسا في سوق الشغل

يعني يطالب الدولة بش تطبّق نفس القوانين على الجنسين: نفس الشهرية لنفس العمل و نفس الفرص للعباد الكل،

بالنسبة للفمينيسم الماركسي المساواة في سوق الشغل ماهي إلّى وسيلة لتركيز المساواة الاقتصادية، يعني القوانين لازمها تتوظّف بش تحقّق المساواة الفعلية، لمرا إلّى تخدم في نفس ظروف الراجل قادرة بش تلبّى احتياجاتها الاقتصادية ، لمرا تستقل بذاتها و علاقتها بالرّاجل في الأسرة ما عادش بش ترتكز على الجانب الاقتصادي و بالطبيعة الراجل زادة يتحرٌر من المسؤولية الاقتصادية تجاه الأسرة و تعود المساواة الاقتصادية بالنفع على الأسرة ثمّ المجتمع ككل بمعزل عن الفرد

الفمنيسم الراديكالي يعتقد أنّ المشكلة بيوليجية بالدرجة الأولى: بما أنّ لمرا هي إلّى تحبل و تولد فجسمها أضعف من جسم الرّاجل و بالتّالى هو نجّم يسيطر عليها لأنها في فترات الحمل و الولادة تحتاجلو بش يقوم بيها

التيار هذا بما أنّو راديكالي فإنّو يقترح حلول راديكالية: تحطيم أسس المجتمع الحالي كيما مفهوم العمل أو الأسرة و بناء مجتمع جديد، مثلا التكنولوجيا الحديثة تنجّم تعوّض مفهوم العمل ككل و تعوّض جسم لمرا بمكينة تحبل في بلاصتها و المجتمع الحديث ينجّم يتلهى بتربية الأطفال و هو ما بش يحرّر المرأة من العامل البيولوجى إلّى حارمها من المساواة و يحرر الراجل من عبء المسؤولية

الإستقلال المثلي يمشي إل أبعد من هكّة و يقترح ـ هو إقتراح و برّة:) ـ إنّو النسا يقطعو كل علاقاتهم الجنسية بالرجال لأجل غير محدود ـ لين الرجال تفهم رواحها يمكن:) ـ لأن العلاقات الجنسية مع الرجال تثبّتهم في مكانتهم القويّة ـ هي ممكن الفكرة تصدم لأوّل وهلة أمّا ما هاش أوريجنال حتّى ترف، هاذي كيما يقولو لفرنسيس وصفة ممّاتي،النسا طول عمرهم يستعملو في الجنس بش يضغطو على الرجال ـ و ثمّ منهم شكون يميل لعدم الإختلاط بالرجال جملة وحدة و تأسيس مجتمع أنثوي ـ ممكن كان يجيبو ولاد يدفنوهم حيّين ما نراش حل آخر لتكوين هالمجتمع

الفمينيسم الاشتراكي يخدم على واجهتين: تثقيف لمرا و توعيتها بحقها في المساواة الكلية و تغيير النظام الاقتصادي الحالي إلّى هو السبب الرئيسي لهيمنة الرجل وهو ما سيغيّر المجتمعات الحالية جذريّا

بعد السرد هاذا يتدخّل الكاتب بش يقول إلّى التيارات هاذي تنقسم إلى تيّار إصلاحي ـ هو اليبيرالي إلّى يحب يبدّل قوانين الدولة ـ والتيّارت لربعة لخرين هي تيّارات ثوريّة تحب تبدّل المجتمع من داخل

هوني يوفى السرد التاريخي إلّى على أساسو بش نقول كليمتين

حسب رايي تكمن المشكلة في حاجتين: المؤسسة والعقليّة، و هوما فى عالمنا الحالي مربوطين ببعضهم

إذا كان القوانين إلّى تحطهم المؤسسة يسبقو العقلية، ثم مشكلة و هاذا ما صار عنّا بالضبط: تبدّل القانون و معاه دور المرأة في المجتمع بين ليلة و ضحاها، و رغم إلّى لمرا خرجت للشّارع و للعمل فهذا ما عاونهاش بطريقة كافية لأنها تعدّات من إستعباد الرّاجل إلّى في الدّار لإستعباد الرّاجل إلّى في الشّارع لإستعباد عرفها إلّى في الخدمة فقط لأنها مرا و لمرا المحترمة تشد دارها، ثمّ هوة كبيرة بين القانون و العقلية

فمّ عقليّات تبدلت و قوانين ما اتّبعش، هاذا أمر سياسي بحت و ماليه إلّا يتصلّح، لأنّو القانون مجعول لخدمة المجتمع بطبيعتو، يظهرلى المشكلة أكبر ببرشة كيف المؤسسة تسبق المجتمع و في برشة بلدان تحلّت مشكلة المؤسسة و قامت بدورها القانوني بطريقة باهية ـ تنجّم تتحسّن لكن الأساس موجود ـ تبقى مشكلة العقلية هي الأهم و الأخطر

نكمّل في بوست ثاني أحسن هكة طوالت برشة لحكاية عليكم و عليّ

أحلام كونفورميست

2009-11-29T15:20:00.000-05:00

إلى فاطمة

2009-11-07T16:45:00.000-05:00

ما نعرفش شنوة نقلك يا فاطمة، عصرت مخّى، ما فيه شي، إلّا تصويرتك بين عينيّ، نحب نهديلك غنّاية أمّا ما عرفتش أنا هيّ، نحب نهديلك قصيدة أمّا ما عرفتش أنا هي،
نهديلك الوردة هاذيّ، ماثمّاش أحلى مالورد الصباح، إنشالله أيّامتك لكلها ورد يا فاطمة

فاطمة

2009-11-07T04:53:00.000-05:00