samedi 13 février 2010

المرأة التونسية على شاشة تونس7

اليومة فادّة و روحي طالعة، قلت أحسن حاجة تفرهدني قناة تونس 7، نفضّلها على القنوات التونسية لخرى، بصراحة فيها نوع من المضحكات المبكيات صعيب يتوفّر في شانات أخرين، برّ عملت طلّة على دايلي مو
 شين ـ موش نغزّل فيكم راهو، و بالعكس ضرنتو القرار رشيد، مخدوم و ذكي غير أحنا شعب نكّار و كركار و كعرار ـ حاصيلو نلقى برنامج علاء الشابي ( لازمو دروس سسيولوجيا و بسيكولجيا والحالة استعجالية) إلّى يجيب فيه النّاس و يحاول يحلّلهم مشاكلهم،
طفلة صغيرة عمرها 18 سنا تحب تعرف أمها الحقيقية، جابو لمرا، مسكينة جاهلة و زوّالية، قالت إلّى هي كانت معرسة و إلّى الطفلة في لحلال، بالطبيعة الموقف محزن و تعيس و هم أزرق، باش المنشط يهدّى الطفلة عيا و هو يقلها إلّى هي بنت حلال، شي يحشّم بصراحة، الموقف يعيّف، ميزيرا إنسانية، طفلة عمرها 18 عام معذبة حياتها الكل، أمها لوحتها و أهم حاجة إنها بنت حلال مش بنت حرام؟
وكان جات بنت حرام، شنوة نعملولها، تأسّفت إنو لحلال و لحرام أهم من العذاب إلى تعيشو لعباد إلّى في الوضع هذا
الحالة الثانية ـ تنجمو تشوفو التسجيل كان عندكم وسع بال و بروكسي ـ تتمثّل في راجل متفارق هو و مرتو ويحب يرجّعها، بش نطرح جميع المشاكل إلّى حكاو عليها لأنها ظهرتلي متاع أوائل القرن الماضي:
ـ الرّاجل  عمرو 27 سنا وهي لازم أصغر شوية و عندهم بنيّة عمرها عامين
ـ بدا الرّاجل يحكي ـ إسمو محمّد ـ قال إلّى المشكلة إنّو مرتو ـ أميرة ـ لسانها طويل و ما تسكتش، يفدلك علاء و يقول هذا شيء عادي، النسا الكل هكّ :
ميساج امبليسيت1 :لمرا ما لازمش يكون لسانها طويل، لازمها تتعلّم تسكت قدّام الرّاجل ـ لأنّو راجل ـ 
 ميساج امبليسيت2: إذا كانك مرا و معرسة و تحب تحافظ على دارك و راجلك سكّر فمّك
تجي لمرا ـ أميرة ـ تظهر متربية و تتكلّم بالمعقول، تقول إلّى أبار الحب في الدنيا هاذي لازم حليب و دوايات و أساسيّات بش تعيش هي وبنتها، راجلها يصبح راقد ما يحبّش يخدم، موش مسؤول، المنشط موافق تماما إنّو هذا موش معقول وإنّو بخلي،
 ميساج امبليسيت3: الرّجال قوّامون على النّسا و إذا كان الرّاجل  موش كبابلي تولّى مرتو لسانها طويل و هذا يحقّلها، أمّا يجيب لفلوس و لّا موش راجل و يستاهل إنّو يتعامل كذلك
الرّاجل يضرب في مرتو، تقول إنّو ديما يضربها، أوّل طريحة كلاتها و هي عروسة 5 يام في الشارع، المنشط يسهلها : هو قال إنّو ضربك مرّة وحدة؟
 ميساج امبليسيت4: كيف يضربك راجلك مرّة وحدة، ميسالش، عدّيها، أمّا موش واضح مرة في الجمعة؟ في الشهر؟ في العام؟ ماذابي نعرف شنية لفركنس المقبولة
المنشط يحب يعمل كنفرنتاسيون بين لكلام إلّى تقول فيه لمرا و إلّى يقول فيه الراجل، هو منحاز للمرا و يقولها بصريح العبارة ما عندو حتّى دليل، إحساس و برّة
 ميساج امبليسيت5: لمرا كائن ضعيف مسكين محتاج لرّعاية في كل الحالات، رعاية المنشط و الزوج و الأب و الرّاجل بصفة عامّة
لمرا تقول إلّى بوها صرف عليها وإلّى هي تجبرت بش تخدم بش تخلّص لكرديات، المنشط سي علاء باقى موافق
 ميساج امبليسيت6: لمرا ما تخدم إلّا ما تبدا مجبورة، لمرا ما تبدا بقدرها إلّا إذا يخدم عليها الرّاجل
تقول هي إنها ما عادش تحب راجلها على خاطر يضرب فيها بالسبتة، يهددها بالسلاح بش يحللها وجهها ولّا يعورها، هوني سي علاء يلح عليها بش تقول إلّى هي لازم مزّالت تحبّو حتى شوية، زعمة كان مرتو تهددو إلّى بش تقصلو كرزة بسكّينة الخبز يقعد في داخلو يحبها حتى شوية؟
 ميساج امبليسيت7: الرّاجل قد ما يعمل لازم يتحب حتى شوية
المنشط يحب محمّد يتعهّد بش يولى يخدم على مرتو و بنتو و يوفرلهم كل شي،
عمرو ما جبد على خدمة لمرا و علاش هي قاعدة في الدّار
قالت إلّى تو فمّ كريز و ما فمّاش خدمة أمّا ما وقفش جملة على الكلمتين هاذم خارجين الموضوع و برّة 
ميساج امبليسيت8: خدمة النسا اكسسوار، ما تخدم كان لمرا إلّى سعدها مكبوب
يحبّو زادة يتعهّد بش ما عادش يضرب مرتو، حتّى ضربا خفيفا لا، كينّى بالرسمى لحكاية أنو ما عادش بش يضربها
بش يقنعها يقلها: موش ساهل على راجل إنّو يعتذر!!
ميساج امبليسيت9: الرّاجل ديما عندو الحق، كان غلط ميسالش يصير على الرجال، أمّا كان اعتذر مالفوق ما عادش كلام وقتها
المنشط عمل كل شي بش يرجعها، نسى إلّى راجلها يهدد فيها بالسلاح
سي علاء يسمح لنفسو بش يقول إنتوما النسا ديما وعوعوع، معناها ديما موش راضين و تقنقنو
ميساج امبليسيت10: أصل المشكل في النسا، كان جاو مبلعين راهو هاذا الكل ما يصيريش
كل كلمة يزيد يقولها المنشط تزيد أعصابي تتوتّر
بش يقنعها يقلها: كيف الناس يراوك مع راجلك خير ملى يراوك وحدك
ميساج امبليسيت11: المطلقات الكل قحاب، راجل أعورلك عينك خير ملّى عندك زوز عينين و ما عندكش راجل
كبّش سي علاء، زاد كبّش، رجّعهم لبعضهم و هي ما عينهاش
 الخلاصة: أنا كمواطنة تونسية نحب نشكي ب سي علاء لأنّو يستسهل العنف ضدّ المرأة، ويجاهر بالميزوجنيا متاعو في لسباس بوبليك إلى هو التلفزة الوطنية و يستغل جهل لعباد بش يقدّم حصّة تلفزية سنساسيونال و ما يهمّوش في العواقب، و كان لمرا هاذي يذبحها راجلها ـ ضربة الموس في عوض ما تجي في وجهها تنجّم تجي في رقبتها، شنوة بش يكون موقفو؟
بصراحة مزّلنا بعاد برشة بين التنظير متاع حقوق المرأة و القانون والواقع و خاصّة العقلية فم هفهوف غارق

17 commentaires:

  1. مسّيك بالخير يا طفلة، اشنية هالفاجعة الي تحكي فيها؟

    النسا الكل وع وع؟ هذا مذيع متاع تلفزة يحكي هكة؟ هو راهو كيف تجي تشوف النسا وع وع مع البعض وما همشي وع وع مع البعض الآخر، مسالة متاع قبول عند البعض و تجوبير عند البعض الآخر

    هذا بعد خمسين سنة وخمسين عودة مدرسية وجامعية، و خمسين سنة قضائية، التفكير ما زال هوني؟ يا خسارة المليارات الي اتصبت في التراب، كان وزعوهم الحنينات هذوكم على العباد كان خير، الي يشري بيهم دوّارة و يغطس في امها والي تشري بيهم قونيلة و صبيغة لشعرها و الي يضربلها كاجو مرناق متاع فرد المرة، و الي تعمل سفرة لطاليا ما يشوفها غادي حد كيف اتبزنس وترجع من بعد للعايلة المصونة، وكل حد يتمتع والدنيا فيها موت، على الاقل تتمتع العباد وتتفرهد شوية

    RépondreSupprimer
  2. انا بالحق قلبي وجعنى ، مادام انصاف المنشطين الغير مؤهلين معرفيا وانسانيا مسيبين على طلق ذراعهم في التلفزة واطية النية اتنجم تلقى العن من هكة

    RépondreSupprimer
  3. c'est très bien 3amcha
    excellent tu commence a retrouver la lumière et a traiter des bons vrai sujet.
    tout le monde regarde ce genre d'émissions car eux mêmes ils ont leurs propres expériences tragiques et cathartiques et en regardant les tragédies des autres se sentent mieux et se réconfortent

    RépondreSupprimer
  4. لوكان المنشط، المنوّم، يجي معاها على طول الخط، يولّي موش راجل و يروّج للميوعة و الإنحلال الأخلاقي و القناة تولّي صهيونيّة و تتآمر بش تمحي الهوية الإسلامية.

    RépondreSupprimer
  5. Et d'autre part, lorsque la comedienne a dit 'Nos mitrou fi kalsounou' sur Nesma, 9amet le9yama et tout le monde protestait contre la liberte d'expression ki a depasse la limite...

    RépondreSupprimer
  6. @Ferrr
    Wallahi la zedet a3lih kelma, ahawka le lien vidéo. Berrasmi faj3a, catastrophe, ce n'est pas supportable. Houwa ma dam ya7ki a3la enssa hakka ma inajam ikoun mejma3a elli ma 3andhech 9boul :))
    Je suis tout à fait d'accord avec toi : plus de 50 rentrées scolaires et universitaires pour en arriver là !!!
    @Arabica : tu penses que c possible de trouver pire ? à la télé ? En tout cas ça m'apprendra à aller sur dailymotion :)
    @3amrouch : Tu penses que j'ai re-trouvé la lumière !!!
    Oui, bien sûr ces émissions jouent sur le voyeurisme du téléspectateur, ils vivent de ça, le malheur des autres, mais enfoncer encore plus le clou avec des répliques pareilles est vraiment inacceptable.
    @3lulu : Oui, tout à fait d'accord, je crois que tout le problème est là. Qu'est ce que ça va donner dans 10 ans si on continue comme ça.
    @Bachbouch :
    Marhbé bik :)
    Les gens sont choqués par kelmet 9alssoun à la télé mais ça ne les choque pas qu'un type menace sa femme de lui crever un oeil, ce n'est pas choquant que l'animateur l'encourage à rester avec lui !!!
    C'est tout simplement dégueulasse.

    Merci pour votre passage, au plaisir de vous voir trainer par ici :)))

    RépondreSupprimer
  7. برنامج فارغ و سخيف و المنشط ،أضرب في الإثنين،
    ، و ها النوعية هذه تغرس في مجتمع عامة الشعب
    أفكار و سلوكيات بداية البشرية و ليس بداية القرن لماضي

    RépondreSupprimer
  8. ميسالش نقولو كليمه معاكم
    عمشه قبل ما نباركلك على خروجك من الظلمات الى النور (الشي اللي نتمنّاه لأمّة محمد الكل ) نحب نعبّرلك على سخطي الشديد على النوعية هاذيكه من البرامج ، و اللي نعتبرها اخطر من الخطب السياسية و البرامج الانتخابية و الكتب و المراجع و المناشير السرية و العلنية على خاطرها تدخل للناس عن طريق ادقّ و اخطر باب وهو باب الوجدانيات و العواطف ، و من غاديكه تسوّق للقيم البيدونه اللي انت لخّصتهم في احداش ن ميساج امبليسيت
    شي يعيّف .. انّهم جزء كبير برشه من هالعشرة ملاين عاملين من شلاكه كيما علا الشابي نموذج متاع طيبه و سلام و تسامح و اعادة مياه الى مجاريها الخ ... شي يعيّف

    RépondreSupprimer
  9. @ برستوس

    إعادة المياه إلى مجاريها ههههه المجاري موجودة أما فتش عن نوعية المياه ههه

    RépondreSupprimer
  10. هذا ما يحدث عندما يقع تكليف شخص "مخنان" وشبه متخلّف ذهنيّا بتنشيط برامج إجتماعيّة

    ما فهمتش علاش في كلّ حلقة لازم يحاول بالسيف باش يرفع الستار ويحقق "إنجاز" التسامح الظاهري بين الأطراف على شاشة التلفزة دون أي تفكير في عواقب "إعادة الأمور إلى مجاريها" بعد نهاية الحصّة

    ياخي لازم الناس الكلّ تتفاهم وتتسامح وترجع أصحاب وأحباب وأزواج؟؟ ما هذا التخلّف والخور؟؟

    RépondreSupprimer
  11. المشكلة موش في علاء الشابي وحدو(هو يلزمو غسلة باهية و بزيد يتغلى على الاقل ليلة في كوكوت) اما زادا في الناس الي تتنافس باش تنشر صابونها قدام عشرة مليون تونسي، و تزيد تاكد الي لا امية و لا جهل تنحاو من هال البلاد. الفكرة متاع البرنامج موش جديدة و كانت تنجم تكون احسن كيف يشرف عليها ناس مختصين وقتها يستفادو الناس لكل و ينجمو يشوفو مشاكلهم برؤية موضوعية و وقتها تكون الفرجة متعة و استفادة للناس لكل

    RépondreSupprimer
  12. @Onsor : ce genre de programme existe partout, dans toutes les télévisions, ça attire le téléspectateur et joue sur le sensationnalisme, le problème c'est que dans d'autres télévisions on ne peut pas dire des bêtises pareilles, quoique sur ma page facebook, une tunisienne résidente en Espagne, dit que ceci s'est passé plus au moins comme ça dans un pareil programme et que le mari, à qui on a pardonné, a fini par tuer sa femme.
    @Brastos : Marhbé bik fi kol wa9t, ça me fait plaisir :) Je suis tout à fait d'accord chay i3ayef, de même @Articuler.
    @BTB : S7i7 3andel modda ma tallitech a3liya, marhbé bik, eddar darek
    @illusions : ach et7eb ta3mel, lazemna berrasmi ghassla be javel ou désinfection générale lel 3ou9oul lem zamra, marhbé bik.

    Merci à vous tous, vous êtes toujours les bienvenus ici.

    RépondreSupprimer
  13. 3asslema ya jmé3a. We BRAVO lel article ama éna 9albi m3ebbi wenti zedt 3liya !
    Malla 7kéya, na7zen kif nchouf we na9ra 7ajét hakka! mich féhma el win méchin bil banalisation mta3 la violence contre la femme we fin méchin bel stagnation fil 9awanin. Ta7ki 3al statut wel 9anoun? éna manestannéch 7aja kbira men 9anoun 3andou 50 ans matbaddalich we matna77ach mennou elli un violeur lézem y3arress bittofla kéni mineur bech maycheddech el 7abs (ettofla sera donc violée chaque soir pendant 2ans, khater lezmou yab9a m3aha 2ans)... el 9anoun ne reconnait pas la violence contre la femme ama 7asseb-ha ka ayy violence et notre loi ne reconnait pas le viol conjugal we mallioun 7aja okhra !! L'approche Genre devrait faire partie du cursus scolaire (je me suis tuée à le dire qd j'étais en Tn) et les dérapages des personnages publics sur ça doivent être punis (de la mise en danger de la vie d'autrui, lel propos discriminatoires el ghirhom mel les délits/crimes)... Je parie elli ma7ké 3liha 7atta 7ad la7kéya hédhi fil les journaux we b9iyét el presse (oui un petit "p" pour Presse khater mafiha mayetta9ra wallét) !! Bref, 9ad manabda hézza rassi ki n9oul éna tounsiYA" là, je sais plus vraiment si je devrais !!

    RépondreSupprimer
  14. ben joli article surtout phaset message numéro... j'ai adoré bsara7a:p
    Ben moi, aussi franchement c'est pour rire que je regarde Tunis7, et même Hannibal tv, (Nesma au moins abrek:p).
    Concernant Ala chabi, manahthmouch bsara7a,il m'énerve cet homme c'est pour ça que je zappe son émission de merde scandaleuse, et j'étais heureuse qu'il était viré de mousami7 Karim, quoi que même cette émission est nulle: mais bon 3andik filham mate5tar.
    Pour la misogynie, c'est pas du jour au lendemain qu'elle disparaitra c'est comme le sida pour moi, elle est fatale, contagieuse et surtout sans remède efficace.

    RépondreSupprimer
  15. bon, l'animateur s'est mis du coté de la femme pour la défendre et on dit que ça sous entend qu'elle est un etre faible, il s'est mis du coté du mari et on dit qu'il est misogyne!! qu'est il sensé faire le pauvre!! ;)

    RépondreSupprimer
  16. essolhou beina ithneini amelon jemil ma dema lissolhi houneka mekan.lekin el fadiha (el allelia ettelfezia) aktharou khataran min el khilefets ezaoujia.donc,la tunisienne qui a dit,sous une forme de remarque ferme:(inhibb nichki b's allel...).je trouve son raisonnement est bien à sa place.

    RépondreSupprimer
  17. Ya3tik essa77a ya mra 3al poste. Wallahi eni netfarrej fi touness 7 momken marra fil 3am, et il se trouve que cette année j ai regardé cette émission dont vous parlez, le même épisode. Et je suis complètement d'accord avec tout ce que vous dites.
    C est rigolo, mais j ai connu votre blog grace a la compagne de censure. Sadda9ni charaf lik elli ton blog est censuré :)
    Bref, garde ta liberté de penser, w idha ken test7a9 7aja, iktibli mail (kreitech@gmail.com)

    RépondreSupprimer