mardi 13 avril 2010

الإرهاب الفكري

في بالي ما نيش بش نحكي علّى صاير على فايسبوك، ظهرلي تفوريخ و حكايات فارغة، سكرولي إل كونت متاعي أربعة مرّات و باقى عاملة فيها عزوزة ما يهمها قرص، برشة يحكيو على أهمية الموضوع في الوضع السياسي و الإجتماعي العام في تونس و أنا الحق موش مقتنعة، نخمّم إلّى هوما كمشة فروخ تلعب اب أورديناتور 
اليوم خرجت فيديو متاع تكريز و بصراحة جاني شوك، زوز فروخ ما عندهمش شي في الطّاسة، يقولو في كلام متاع بهامة، مزينينو بطرف كلام زايد، كينّو لكلام الزّايد وسيلة تعبير مجدية كيف يبدا الخطاب فارغ و تافه و ماهوش ستروكتوري

  حديث ما جاب شي جديد، و يتعرّض إل أشخاص معينين في عوض ما يجيب فكرة جديدة حتى ولو تكون متواضعة أمّا بلقليلة تغني نقاش، حتى مل كلام الزّايد فن راهو، كيف تعرف تستعملو في بلاصتو إ أدّى مهمتو و يكون بركوتون،نافذ، مؤثر معناها، كتبدى تطيّش فى لكلام هكّاكة يعطى عكسو، يطيّح من مستوى العبد إلّى يقول فيه و من مستوى النقاش و ينحّى أي شرعية تحب تعطيها لل حديث،
 نتمنّى إلّ الميساج وصل و إلّ ممكن ليترارشويّة ما يتفهمش:)
وجه الشبه بين الفيديو متاع تكريز والحشرات متاع فايسبوك زوز حاجات: لعمر(الزّوز صغار في لعمر، هكّه يبان، أقل م ثلاثين يظهرلى) و الهمجيّة لمخلطة بالتفاهة ( بالطبيعة كيف يبدا الإنسان فارغ يولّى عنيف، شرس و ما ينجّم يعبّر على مقصودو كان بالطريقة هاذي)
الزّوز يقولو إلّ عندهم هدف فى إلّ يعملو فيه ومقتنعين اب فكرة معينة يحبّو يدافعو عليها،  الخطير فى الموضوع هو طريقة الدفاع عليها، الزوز يستعملو الإرهاب الفكري و إقصاء الآخر،
 بالفعل ممكن إلّى خطير إلّى قاعد يصير في العالم الإفتراضى، يورّى فينا إل سياسة القمع و الإرهاب قاعدة تجيب في جنراسيون متطرفة المهم عندها تسكّتك، تتصوّر إلى هي عندها الحقيقة المطلقة و تتهجّم على لخرين بش تفرض أفكارها
سيستام لقراية فى تونس مفتوح للجميع، صحيح لعباد الكل تقرا، أمّا شنوة تعلّمنا؟ تعلّمنا ننقدو؟ تعلّمنا نوصلو فكرة؟ تعلمنا نستعملو حجة علّى نقولو فيه؟ تعلمنا أحفظ و صب و ما تناقشش
السيستام ولّد الكبت، و الكبت الفكري و السياسي و الإجتماعي 
 خلّى تو صغارنا ما ينجموش يدافعو على فكرة من غير ما يعتديو على لعباد إل ما تشاركهم الفكرة أو المعتقد أو المنهج 
نتيجة خمسين سنا خنقة، تو لازم نستانسو بالنوع الجديد هاذا متاع الإرهاب، مواكب عصرو
 يظهرلى بالحق: المستقبل بش يكون أظلم ب برشة مالماضى و الحاضر




ما حطّيتش الروابط متاع الفيديو و الصفحات متاع فايسبوك على خاطر ياسر المستوى هابط بصراحة

samedi 3 avril 2010

هي... و هي

هي: ماذا بيّ نهارنفهمك، بالله أحكيلى شنوما هالأولويّات إلّى تحكي عليهم
هي: نحب لفوياجات برشة، لفلوس إلّى بش نحطها في ميكرواوند ولّا ماشين أليفى ولّا تلفزة ولّا كرهبة و ما خالفه من سلعة تفسد و تتلوّح نفضّل نلمهم نسافر بيهم خير، نحوّسّ نشوف العالم لعباد، نتمنّى ذاكرتى ما تفسدش و بلقليلة الذكريات هاذى تقعد
هي : معاك، عندك الحق، ما هومش حاجات إجبارية أمّا ماك تعرف كيف يبدا عندك صغار بين تسخين البيبرونات و 3 ماكينات صابون تعملهم في النهار و هزّان و جيبان للمكتب، عذاب، هالحاجات الزايدة تولّى تعاون في تحسين عيشتنا
هي: هههه، مسكينة:) أنا بصراحة ما حاشتي بصغار، السماح، وين تحكيلي هكّة نترعب و نقول لواه، أهيكة لعباد الكل تجيب في الصغار، خلّيني رابحة راحتي
هي: وحّلتها في راسي؟ لا يالّ، شمدخّلني، أنا موش مسؤولة، أمورك، تحمّل مسؤوليتك، باش ناخو موقف، جيب صغار كيما النّاس الكل، و أهوك كيما  النّاس و أقل من  النّاس و خير من  النّاس
هي: أيوه هو شنوة هردنا، لا ياللّ قلّك بيبرونات و 3 ماكينات في النهار، و أمبوتياج و هاو ولدك ضرب ولد المعلمة و إيجاها ملّوط، دبّر على روحك، آش لزّنى أنا 
هي: أي ما تنساش لحديد زادة، والدوفوارات و هاو مرض و فاكسانات و طبة، أمّا جو شايخين
هي: أخطاني، حياتى هكّه باهية، نزيد نعيشها شويّة، كيف نبيّل و نفد مالحرية، نستبنى وليّد ولّا بنيّة من 5 سنين ف ما فوق، بالله سؤال حيّرني : لحديد لواه؟ ت صغار ديما اممرمدين زايد تحديد الدبش، على العينين تقول إنت؟
هي: ههههه،  أعمل حتّى زويّز صغيرات تو تفهم لواه
هي: أووه، أنا لعصب ما انّجموش، يجعلنى نقوم بروحي،أمّا نخمم بالحق بش نستبنى، شقولك؟ ديما يقولو إلّى الصغار إلى يفوتو ال 5 سنين ما عادش يستبناوهم لعباد، مساكن بصراحة يحممو إل قلب، عاد ناخذ واحد ولاّ ثنين نربح فيهم ثواب، ت معناها
هي: تظهرلي صعيبة لحكاية، التنشئة الإجتماعية متاع الصغار المستبنيين لازمها برشة خدمة، و زادة لازمك تبدا مار تريزا
هي: اننجم نجيب صغار، ساهلة العمليّة، أمّا لواه نعمل كيما النّاس الكل، 
هي: امرجتنى، اي شبيه مو اعمل كيما الناس الكل، علاش ديما تفركس بش ما تعملش كيما النّاس الكل، رد بالك، فدلك فدلك، ممكن تكون غالطة 
على طول الخط،
 برّ برك، تحب وليّد ولّا بنيّة؟ سمرا ولّا بلوندا؟ في كل الحالات لازمك تلقى فارس الأحلام قبل
هي: ما نعرفش، كيف كيف، ممكن بنيّة، سمرا خير، لبلوندات منعوتين بالبهامة، استنّى السّاعة، 
ولواه الرّاجل، هتو نشري دبّوسة و برّة، تختار بالكتلوق
هي: :علاه؟ تنجم تلقى واحد باهي يطيّب، ينظّف، يحدّد، يتلهى بالصغار، ما يحبّش الكورة، ما يقعدش في القهوة، يحبّك برشة برشة ، يقول كان كلام حلو و يهديلك النّوّار مالفوق، ههههههه
هي: زعمة؟ نسيت حاجة مهمّة ياسر ذكي ومتثقّف، نحبّو يبدا يحدّد و يحكيلي على سبينوزا
هي: هههههه، ملّا فنتازم، فيق على روحك وين بش تلقاه هاذاي، في بالي بيك رزينة و بعقلك و عايشة في الواقع موش فى الخيال الواسع
هي:  زعمة؟ ما ثمّاش؟ دوماج
هي: هو كل شي ممكن، سبحانو، على كل شيء قدير
 بون، آش بش نعمل، ممكن فمّ حاجات اننجّم نتنازل عليها
هي: ايوه هانا جيناها، يظهرلى فيك إلى مشكلتك إنك ما تراش علاقة متاع مستقبل، تخمّم كان في الوقت الحاضر
هي: علاه؟ أنا الحق تو ما عادش نخمّم في الموضوع هاذا، كنت في وقت من الأوقات أمّا المهم تو بالنسبة ليّ هو مستقبلي المهني و كيفاش نخطّط إل مستقبلي وحدي
هي: ستوب ستوب، علاه هالكلام
هي: على خاطر هاذاك الواقع، موش قتلي فيق، نرا الواقع و نعمل بيه، مانيش بش نقعد نفونتازمى على فارس الأحلام
هي: أي باهى أمّا ما فيها باس كان تخطيطك يخلّى مكان إل علاقة جدّية
هي: أوكي، كان جا نعملّو بلاصة، أمّا ما نخليش بلاصة فارغة و بالوقت تكبر و ترصّيلي نقاسي فيها
هي: أعمل برامجك على روحك أمّا كان نهار تتعرّف على واحد مالازمكش تبدا كيما العوانس، جاك على غفلة و ما نجّمتش تتعامل معاه، لازمك تكون واقعيّة أمّا ايجابية، حياتك العاطفية مهمّة لازمك تتلهى بيها
هي: علاه؟
هي: بش تكون سعيدة
هي:علاه؟ ما نحقق السعادة كان بالعرس؟ فكرة مسبقة إنّو ما نجمو نكونو سعداء كان كيف نبداو اثنين، علاه اثنين و موش ثلاثة؟ شكون حدّد الرّقم؟
هي: ممكن
هي: و خاصّة بالنسبة لنساء، ونسمّيوهم بايرة و عانس، شنوة المذكر متاعهم الكلمتين هاذم؟
هي: شيهمنا فى الأسامى، تعرفني موش نحكي على هذا
هي: إل أسامي هاذي تعني إلّى لمرا إلّى ما يخذهاش راجل ما تسوا شي، تستمد قيمتها برضاء الرّاجل عليها مهما كان أقل منها، والعكس غير صحيح هذاك علاش ما ثمّاش مذكّر
هي: هاذي ميزوجينيا اجتماعية موش هذا الموضوع، أنا عليك إنت، ممكن تو ما حاجتكش براجل، أمّا بعد عشرة ولّا خمستاش ان سنا...
هي: علاش لازمني راجل واحد لل 40 سنا الجايين؟
 هي: ممكن أسهل تو بش تلقى شكون
هي: معناها لازمنى ضمان لل 15 سنا  الجايين ؟
هي: لا، نقصد إلّى إذا كان تلقى شكون تعيش أسعد
هي: برشة معرسين و حياتهم تعيسة جدّا
هي: و برشة لا، خسارة تقعد وحدك
هي: علاش بالنسبة لينا السعادة مربوطة اب عبد آخر، علاش ما نجّمش نعيش وحدي، نبرمج حياتى، نقرّر وحدي كان نحب نجيب صغار و إلّا كان نحب نستبنى صغار، 
هي:
...
هي: الأصعب هو كونى نعمل هاذا الكل وحدي لكن أرتح، إلّى نرفضو هو كوني ناخذ إلى يجي بش ما يقولوش عليّ بايرة و بش نعمل كوفرتور اجتماعية
نحب نعيش حرّة
هي: تعيش أسعد معرسة، و إلّا لا، المهم موش وحدك
هي: هاذي فكرة اتأصلت فينا ملّى سماعنا إب بونا آدم و أمنا حوّاء، ولّينا ما نحققو شخصيتنا إلّا عن طريق الرّاجل ولّا لمرا، نراو رواحنا ثنين فى عوض واحد
أخطر حاجة هو إنّنا نختارو شريك الحياة على خاطرنا محتاجينلو مهما كانت الحاجة مادّية، عاطفية، جنسية ولّا اجتماعيّة
هي: آآآآه كسّرتلى راسي، يا بنتي أنا على خاطرك راهو، دبّر   
راسك، آش لزنى حتى أنا ماهو إلّى يشتهي شهوة
 يعملها فى عشاه
خلّينى نمشي نروّح بولدي مالمكتب ما انحبّش نبطى عليه
هي: استنّى نقلّك
...
هي: غدوة غدوة ولّا تو نطلبك في الليل، ماك تعرف الأولويّات
...