mardi 13 avril 2010

الإرهاب الفكري

في بالي ما نيش بش نحكي علّى صاير على فايسبوك، ظهرلي تفوريخ و حكايات فارغة، سكرولي إل كونت متاعي أربعة مرّات و باقى عاملة فيها عزوزة ما يهمها قرص، برشة يحكيو على أهمية الموضوع في الوضع السياسي و الإجتماعي العام في تونس و أنا الحق موش مقتنعة، نخمّم إلّى هوما كمشة فروخ تلعب اب أورديناتور 
اليوم خرجت فيديو متاع تكريز و بصراحة جاني شوك، زوز فروخ ما عندهمش شي في الطّاسة، يقولو في كلام متاع بهامة، مزينينو بطرف كلام زايد، كينّو لكلام الزّايد وسيلة تعبير مجدية كيف يبدا الخطاب فارغ و تافه و ماهوش ستروكتوري

  حديث ما جاب شي جديد، و يتعرّض إل أشخاص معينين في عوض ما يجيب فكرة جديدة حتى ولو تكون متواضعة أمّا بلقليلة تغني نقاش، حتى مل كلام الزّايد فن راهو، كيف تعرف تستعملو في بلاصتو إ أدّى مهمتو و يكون بركوتون،نافذ، مؤثر معناها، كتبدى تطيّش فى لكلام هكّاكة يعطى عكسو، يطيّح من مستوى العبد إلّى يقول فيه و من مستوى النقاش و ينحّى أي شرعية تحب تعطيها لل حديث،
 نتمنّى إلّ الميساج وصل و إلّ ممكن ليترارشويّة ما يتفهمش:)
وجه الشبه بين الفيديو متاع تكريز والحشرات متاع فايسبوك زوز حاجات: لعمر(الزّوز صغار في لعمر، هكّه يبان، أقل م ثلاثين يظهرلى) و الهمجيّة لمخلطة بالتفاهة ( بالطبيعة كيف يبدا الإنسان فارغ يولّى عنيف، شرس و ما ينجّم يعبّر على مقصودو كان بالطريقة هاذي)
الزّوز يقولو إلّ عندهم هدف فى إلّ يعملو فيه ومقتنعين اب فكرة معينة يحبّو يدافعو عليها،  الخطير فى الموضوع هو طريقة الدفاع عليها، الزوز يستعملو الإرهاب الفكري و إقصاء الآخر،
 بالفعل ممكن إلّى خطير إلّى قاعد يصير في العالم الإفتراضى، يورّى فينا إل سياسة القمع و الإرهاب قاعدة تجيب في جنراسيون متطرفة المهم عندها تسكّتك، تتصوّر إلى هي عندها الحقيقة المطلقة و تتهجّم على لخرين بش تفرض أفكارها
سيستام لقراية فى تونس مفتوح للجميع، صحيح لعباد الكل تقرا، أمّا شنوة تعلّمنا؟ تعلّمنا ننقدو؟ تعلّمنا نوصلو فكرة؟ تعلمنا نستعملو حجة علّى نقولو فيه؟ تعلمنا أحفظ و صب و ما تناقشش
السيستام ولّد الكبت، و الكبت الفكري و السياسي و الإجتماعي 
 خلّى تو صغارنا ما ينجموش يدافعو على فكرة من غير ما يعتديو على لعباد إل ما تشاركهم الفكرة أو المعتقد أو المنهج 
نتيجة خمسين سنا خنقة، تو لازم نستانسو بالنوع الجديد هاذا متاع الإرهاب، مواكب عصرو
 يظهرلى بالحق: المستقبل بش يكون أظلم ب برشة مالماضى و الحاضر




ما حطّيتش الروابط متاع الفيديو و الصفحات متاع فايسبوك على خاطر ياسر المستوى هابط بصراحة

10 commentaires:

  1. كبت و بطالة وقمع، جابولهم فايسبوك باش يتنفسو، ماعرفوش كيفاش :( شيء يحمم القلب، النقاش مافماش، والاتاك تطبق على الناس موش عالافكار، مسكينة تونس!

    RépondreSupprimer
  2. حُطّلنا الروابط خلي نفهموك علاش تحكي.
    ما بيناتنا أنا زادا موافق الي هوما شوية ذرّي ويظهرولي الأوصاف الأخرى الكل مبالغ فيها

    RépondreSupprimer
  3. أتفق معك في تحليلك لما هو واقع و لكن أختلف معك في الخاتمة

    لا زلت أحمل قليلا من الأمل أكثر منك في مستقبل أفضل و وردي

    قد تقولين أني متفائل جدا و لكن لو تحسبين عدد المنخرطين في المجموعتين لن تجدي أكثر من 2000 أو ثلاثة ألاف أكثر و عدد التونسيين في الفاسيبوك يقاس بمئات الألاف إذا هم حتى و إن نجحو في ما يقومون به يبقون قلة قليلة...

    التاريخ علمنا أن التطرف لا ينتصر حتى و إن بان له أنه إنتصر في بعض المعارك الصغيرة

    RépondreSupprimer
  4. La réalité interpelle et le constat est frappant. Il y a parmi cette jeunesse non-conformiste une frange extrêmement passionnée prête à se radicaliser. Si l'on additionne aux exemples cités dans la note les tristes évènements survenus au stade d'El Menzah, il devient clair qu'il y a chez certains jeunes de sérieux problèmes de communication et de canalisation concernant certains sujets face à la représentation qu'ils se font des affaires qu'ils considèrent centrales dans leur vécu.

    RépondreSupprimer
  5. عمشه انتي الوحيده اللي ماعرفتش علاش يستهدفو فيك ، كان تحكيلنا شويه مع شكون تعاركت او عندكش اعداء افتراضيين ممكن تساعدنا في سير التحقيق و شكرا لتعاونك .

    RépondreSupprimer
  6. @hmida
    ...كان تحكيلنا شويه مع شكون تعاركت... عندكش اعداء... ساعدنا في سير التحقيق
    bizarre comme termes d'un commentaire...ceux qui t'accusent d'etre policier ont peut etre raison

    RépondreSupprimer
  7. Ils ont attaque mon compte Facebook 2 fois dans l'espace de 2 jours uniquement. Je crois que certains d'eux m'ont pris pour le Facebookeur "Sofienne David", la star de l'atheisme sur Facebook. Ca se voit que ce sont des gamins, mais parait-il qu'il y'a des gens "majores-vaccines" qui sont derriere ces gamins.

    RépondreSupprimer
  8. je pense que c'est le système d'éducation, on n'apprend pas aux jeunes l'esprit critique. C'est la pensée à sens unique. Même les professeurs de philo sont conformistes à certaines valeurs rétrogrades, sinon intégristes. On regrette les professeurs français (issus de la coopération française)au temps de Bourguiba (années 60 et 70) qui nous ont inculqué l'esprit critique et certains valeurs universelles dont on est fière.

    RépondreSupprimer
  9. @Dame de pique : c'est effectivement les maux sociaux qui créent ces dérives.
    @M : je n'ai pas mis les liens parce que je ne veux pas faire de la publicité à des gens que je considère comme des moins que rien. Oui, je pense que ce sont des gamins, mais ce qui est lamentable c'est que les gamins des autres commencent à travailler à 16 ans et que les nôtres profitent de leur temps libre pour terroriser ceux qui ne partagent pas leurs avis, si on peut appeler ça un avis.

    RépondreSupprimer
  10. @Chanfara : Je crois qu'à travers l'histoire, il y a eu des périodes très sombres, je pense sérieusement que nous devrions nous préparer à un avenir difficile. T'es optimiste, c'est bien mais il faut savoir être réaliste aussi.
    TunObs : Je suis tout à fait d'accord avec toi, malheureusement on voit le radicalisme dans toutes les factions et encore plus dans le foot, le nouvel opium du peuple !
    @Soufiène : dans mon cas 4 fois en une semaine ou un truc comme ça, qui se cache derrière ? Peu importe, le fait est là, ça va mal.
    @Anonyme : Nous sommes tous capables d'avoir un esprit d'analyse et de critique, le problème c'est l'environnement dans lequel nous sommes. Je ne regrette pas les coopérants français, je regrette la situation de mon pays et de mes jeunes compatriotes !

    RépondreSupprimer