ما تصح الصدقة إلّى ما تززّى إمّالى الدار؟

عندي 9 سنين نسكن في الكيبيك، هالمدّة بطّالة، نفركس في خدمة أمّا ما لقيتيش، شوية كريز على شوية راسيزم، ليّ 6 شهور قاعدة

فى السنين إلّى فاتت الكل عمري ماحسّيت روحي قريبة لل قباقبة، باردين كطقسهم، أندفدويلست، يصيرش زلزال، كل فول لاهي في نوّارو، تعيش هوني وحدك، كل شي مبني على الإنتاجية، أنا أنتج إذا أنا موجود، ليّ 6 أشهر ما ننتجش، معناها موش موجودة في المجتمع هذا

اليومة الصباح ـ أنا راقدة الحق، ماو تعرفو أوّل سامبتوم متاع لبطالة هو النوم ـ ضرب التلفون، جاتني خدمة استعجالية، قلت خلّى ننتج شوية و نحس بوجودي هالأيّمات

 الخدمة متاع جمعة هكّاكة، بش نجاوب على تلفونات لعباد إلّى تحب تعطي فلوس إل هايتى، ضميري عذّبني، قلت بش نسترزق من مصايب لعباد،أكبر حتى من مصيبة، مأساة، موتى، حيين كيف الموتى، جوع، مرض، لبلاد الكل بركت، شي فعلا يحزّن القلب و المخ، قلت ممكن إلّى بش نخدمو ينفعهم حتّى شوية

هزّيت روحي، خذيت المترو ـ كيما الخدّامة الكل، ماحلاه الوجود ـ وصلت لسّنتر، أنا دخلت نلقى صالة كبيييرة، فيها أقل حاجة 30 بشر كل واحد شادد بوست، عطاوني بلاصة، كاسك و اوردينتورـ ذبت في البيزاج ـ أنا حطّيت الكاسك و التلفون بدا يضرب، 7 سوايع النفس لا، نحكيلكم على أربعة ما نسيتهومش

ـ مرا و راجل كبار في لعمر، ممكن يقراو شوية وبرة على خاطر شيحولي ريقي و أنا نفهّم فيهم وين يلقاو نمرو الكارطة و تاريخ نهايتها، بعد ما نجمو يعطيوني المعلومات الصحيحة وهوما واحد يعدّى في التلفون للّاخر سهلتهم قدّاش بش يعطيو، قالو 350$ (دخت ـ لي 6 شهور بطّالة راهو، وهوما أكيد متقاعدين و تتسمّى تفتوفة باهية بالنسبة ليهم)

ـ مرا عطات 365$، تعجّبت مالدقة متاع لعدد، سهلتها، كل عام، وكل نهار في هاكالعام تحط دولار على جنب، آخر العام تعطيه لجمعية خيرية، أمّا الزلزال ضرب أوّل العام، ما عندهاش فلوس، زادت في المارج متاع لكريدي ـ معناها تسلفت فلوس بل لنتريس ـ وبش تلمهم بالدولار بالدولار على طول العام

ـ راجل عطى 200$، عدّالى مرتو عطات 200$، عدّاتلي بنتهم عطات 50$، زادت عدّاتلى خوها عطا خمسين دولار

ـ مرا طردوها مل خدمة، راجلها لحق عليها، مكتئبين الزوز، كيف راو إلى صار في هايتي حمدو ربّى على الصحة و عطاو 300

ـ مرا تكلّم فيّ و تتفرّج في التلفزة و تبكى بالشهقة:  500 

أقل حاجة عملت 30 ألف دولار، السنتر محلول24/24

حلّوه بش يعاونو المراكز لخرين متاع الهلال الأحمر على خاطرهم عملو بوق جنرال، وقفو الكل من جرة الكمية المهولة متاع التلفونات
حاجة أخرى: لعباد تسهل شنوة بش يعملو بالفلوس، وقتاش بش يوصلو إل غادى، مهتمّين معناها موش تطيير ملام و برّة

ما نيش نحكي على عباد إلّى عطاو ألف و ألفين و 3 لاف دولار، هاذوكم لاباس عليهم، ينجمو يعطيو، إلّى بهّتنى هوما لعباد المتواضعة إلى نحّات من روحها بش تعطى لّلى فقدو حتى الإحساس بإنسانيتهم، هام طلعو موش باردين و موش أنانيين و يحسو بغيرهم، هاي الفكرة إلّى تصنعت عندي لمدة 9  سنين تبدلت كلّيا، حسّيت بالسعادة إنّى نعيش في المجتمع هذا مع لعباد هاذم إلّى قيمة الإنسان عندهم أهم قيمة

لحكاية هاذي مسّيتنى و خلّاتنى نخمم، علاش لعباد هاذم يساندو المنكوبيين فى هايتى أمّا ما يساندوش البطّالة فى بلادهم، علاش ينحّيو من رواحهم و يعطيو على أساس التصاور متاع التلفزة و كيف تطيح قدّامهم في الشارع حتى حد ما يغزرلك، علاش أكره ما يكرهو هوما السكان الأصليين متاع أمريكيا (الهنود الحمر) ويخلّيوهم يغرقو فى للكول و المخدرات ؟؟؟

علاش ما تعيش معاهم إلّا ما تكون منتج و عنصر فاعل اقتصاديّا و ما يهزّوكش كان طاحت بيك، كيفاش ننجمو نفسرو الفنومان هذا؟